जनकपुर टुडे

२०७७ बैशाख ९, मंगलवार १६:२९

बनेपा । लकडाउनका कारण काठमाडौंमा रोकिएका सिन्धुलीका सात सयभन्दा बढी मानिसहरु मंगलबार गाउँ गएका छन् । काठमाडौंका विभिन्न ठाउँबाट हिँड्दै भक्तपुरको जगाती र काभ्रेको बनेपा पुगेकाहरुलाई गाडी चढाइएको हो ।

स्थानीय जनप्रतिनिधिले बनेपामा सिन्धुलीको स्थानीय तहसम्म पुग्ने गाडीको बन्दोबस्त गरेका थिए । एउटै गाउँ जाने मानिसहरु छुट्याएर गाडीको बन्दोबस्त गरी पठाएको सुनकोशी गाउँपालिकाकी अध्यक्ष दीपा बोहराले जानकारी दिइन् ।

स्थानीय जनप्रतिनिधिको सहयोगमा गाउँ फर्किने व्यवस्था भएपछि उनीहरु खुसी पनि थिए ।

तर भक्तपुरको जगातीबाट विहान साढे ९ बजे छुटेका कतिपय गाडीलाई बनेपामा स्थानीय प्रशासनले रोक्यो । दिउँसोको समयमा गाडी लैजान नपाइने भन्दै स्थानीय प्रशासनले रोकेपछि बनेपाका सडक र बसपार्क क्षेत्रमा भीड नै लाग्यो ।

गाडी रोकिएको समय पारेर सबैलाई एक पार्टी प्यालेसमा खाजा र खाना खुवाइएको थियो । ‘सबैलाई खाना खुवाउने भनेका थियौं तर पुगेन, धेरै जनाले चाउचाउ र चिउरा खानुभयो’ अध्यक्ष बोहराले अनलाइनखबरसँग भनिन् ।

स्थानीय जनप्रतिनिधिले भने प्रमुख जिल्ला अधिकारी र प्रहरी प्रमुखसँग छलफल गरे । स्थानीय प्रशासनले रातिको समयमा पठाउने भने पनि आफूहरुले सडक अप्ठ्यारो भएकाले दिउँसो नै पठाउन जोड गरेको अध्यक्ष बोहराले बताइन् । ‘उहाँहरुले बेलुका लैजान ठीक हुन्छ भन्नुभएको थियो, तर सिन्धुली जाने सडक अप्ठेरो भएकाले हामीले दिउँसो नै लैजाने जोड ग¥यौ’ उनले भनिन् ।

त्यसपछि आधा आधा घण्टाको फरकमा गाडी छुटाउने गरी सहमति गरेको अध्यक्ष बोहराले जानकारी दिइन् ।

काभ्रेपलाञ्चोकका प्रमुख जिल्ला अधिकारी श्रवणकुमार तिमिल्सिनाले पनि दिउँसो भन्दा रातिको समयमा सहज हुन्छ भनेर रोकेको तर धेरै मानिस व्यवस्थापन गर्न कठिन हुने भएपछि सिन्धुलीतर्फ जानेहरुलाई पठाएको बताए ।

‘लकडाउनको समयमा दिउँसोमा मान्छे घटाएकै छौं, बरु बेलुकामा सहजीकरण गर्न सकिन्छ’ उनले अनलाइनखबरसँग भने, ‘तर मान्छे धेरै भएपछि सोसल डिस्ट्यान्स मेन्टेन गर्न पनि गाह्रो हुने देखिएपछि पठाएका हौं ।’