जनकपुर टुडे

२०७७ बैशाख १५, सोमबार १४:४१

काठमाडौं । गृह मन्त्रालयले उपत्यकासहित अन्य जिल्लाबाट यात्रु ओसारपसार नगर्न निर्देशन दिएको छ। उपत्यकासहित विभिन्न जिल्लाबाट घर फकर्ने यात्रुलाई स्थानीय तहले उद्धार गर्दै आएपनि अर्को निर्णय नभएसम्म भन्दै गृह मन्त्रालयले यात्रु ओसारपसार गर्न रोक लगाएको हो।

सोमबार गृह मन्त्रालयले ७७ वटै जिल्ला प्रशासन कार्यालयलाई परिपत्र गर्दै अत्यावश्य सेवा बाहेकका सवारी साधन सञ्चालन तथा यात्रु ओसारपसारलाई पूर्ण रुपमा रोक लगाउन निर्देशन दिएको छ।

गृहमन्त्रालयका सह–प्रवक्ता उमाकान्त अधिकारीका अनुसार जुनसुकै हालतमा लकडाउनलाई कडाइका साथ लागू गर्न र सोहीअनुसारको व्यवस्था मिलाउन सुरक्षा निकाय र जिल्ला प्रशासन कार्यालयहरुलाई निर्देशन दिएको हो।

साथै, गृह मन्त्रालयले अत्यावश्यक सेवा बाहेकका सवारी साधनलाई पास वितरण नगर्न जिल्ला प्रशासन कार्यालयहरुलाई पुन निर्देशन दिएको छ।