२०७७ बैशाख २०, शनिबार २०:२०
इस्लामाबाद। पश्तुन तहफुज आन्दोलन (पीटीएम) का नेता आरिफ वजीरलाई एक अज्ञात समूहले गोली हानी हत्या गरेको छ । आफ्नै घरनजिकै गाउँमा रहेका समय शुक्रबार राति एक समूहले वजीरमाथि गोली हानेपछि घाइते अवस्थामा तत्काल उहाँलाई अस्पताल पु¥याइएको थियो । उहाँको उपचारका क्रममा शनिबार स्थानीय अस्पतालमा मृत्यु भएको हो ।
वजीर एक महिना अघि जमानतमा जेलबाट रिहा हुनुभएको थियो ।
“खैबर पख्तूनख्वा प्रान्तको वजिनामा बस्दै आउनुभएको उहाँको घरको नजिकै अज्ञात व्यक्तिहरूले उहाँलाई गोली हानी घाइते पारेका पाकिस्तानी समाचार संस्था ‘डन’ले जनाएको छ । डनका अनुसार गोली लागेपछि लगत्तै वजीरलाई नजिकैको अस्पतालमा लगिएको थियो । उहाँको उपचार त्यहाँ सम्भव नभएपछि उहाँलाई इस्लामाबादस्थित अस्पतालमा सारिएको थियो ।
वजीरका काका, मुहम्मद अली वजीरले परिवारका तर्फबाट शनिबार जारी एक विज्ञप्तिलाई उद्धृत गर्दै द न्युज इन्टरनेसनलले भनेको छ, “वजीरलाई रातिको समयमा गोली हानिएको छ । उहाँको शरीरमा तीनवटा गोली लागेको छ ।”
प्रहरीले वाना पुलिस स्टेशनमा वजीरमाथिको आक्रमण सम्बन्धमा पहिलो सूचना रिपोर्ट (एफआईआर) दर्ता गरेको छ ।
२०१७ मा वानाको नजिक लडाकूहरूसँगको झडपमा वजीरको परिवारका सात सदस्य मारिएका थिए ।
यसैबीच, एम्नेस्टी इन्टरनेसनलले शनिबार आरिफ वजीरमाथिको हमलाको प्रभावकारी छानबिन गर्दै संदिग्ध अपराधीलाई कानूनी दायरामा ल्याउन आग्रह गरेको छ ।
पीटीएम पाकिस्तानमा अधिकारका लागि संगठित तथा वकालत गर्दै आएको आन्दोलन हो । आन्दोलनले आदिवासी क्षेत्रमा राज्य नीतिहरूको आलोचना गर्दै आएको छ । यसले विवादास्पद हत्या र बलपूर्वक बेपत्ता पार्ने सवालमा पनि सरकारको बिरूद्ध आवाजलाई वुलन्द उठाउँदै आएको छ ।
