२०७७ कार्तिक २४, सोमबार ०८:२२
अमेरिकी राष्ट्रपतिको निर्वाचनमा पराजय बेहोरेका वर्तमान राष्ट्रपति डोनाल्ड ट्रम्पका कानूनी सल्लाहकारले कही राज्यमा मत चोरी भएकाले अदालत जाने बताएका छन् ।
डोनाल्ड ट्रम्प आफैले केही राज्यको परिणामलाई लिएर कानूनी चुनौती दिने योजना बनाइरहेको सार्वजनिक भइरहेका बेला उनका कानूनी सल्लाहकार रुडी गिलियानीले खासगरी ४ राज्यमा मत चोरी भएको दावी गरेका हुन । निर्वाचन परिणाम पछि फक्स न्युजलाई प्रतिक्रिया दिँदै गिलियानीले ट्रम्पले हार स्वीकार्नु पनि गलत भएको बताएका छन् ।
कम्तीमा ४ देखि १० राज्यमा मत चोरी भएको स्पष्ट प्रमाण भएको गिलियानीको भनाइ छ । ट्रम्पको चुनावी अभियानले भने यसबारे कुनै प्रमाण सार्वजनिक रुपमा प्रस्तुत गरेको छैन । तर सोमबार केही मुख्य राज्यको मतपरिणामलाई लिएर अदालत जाने ट्रम्प पक्षधरकाे तयारी छ ।
उता राष्ट्रपतिमा निर्वाचित जो बाइडेनले आगामी जनवरीदेखि पद सम्हाल्ने तयारी गरिरहँदा ट्रम्प समर्थकले चुनावमा मत चोरीको आरोप लगाउँदै प्रदर्शन गरिरहेका छन्। जर्जियाको संसद भवनअगाडि उनीहरुले प्रदर्शन गरेका हुन्।
