२०७९ बैशाख १४, बुधबार ०७:२५
राजविराज । यहि वैशाख ३० गते हुने स्थानीय तहको निर्वाचनमा सप्तरीका पाँच जना पत्रकार प्रतिस्पर्धामा छन् ।
नगर प्रमुख, गाउंपालिकाका उपाध्यक्ष र वडा अध्यक्ष पदमा पत्रकारिता गर्दै आएकाहरुले मनोनयन दर्ता गराएका छन् । निर्वाचन कार्यालयका अनुसार भोला पासवानले कञ्चनरुप नगरपालिकामा जनता समाजवादी पार्टी (जसपा) बाट मेयर पदमा मनोनयन दर्ता गराएका छन् । उनी अहिले नेपाल पत्रकार महासंघ मधेश प्रदेश समितिका सचिवसमेत रहेका छन् । त्यस्तै , राजविराजबाट प्रकाशित मधेश क्रान्ति साप्ताहिकका सम्पादक हेमशंकर सिंहले तिलाठी कोइलाडी गाउंपालिकाबाट उपाध्यक्षमा प्रतिस्पर्धा गर्दैछन् । जनता प्रगतिशील पार्टीबाट उनले मनोनयन दर्ता गराएका छन् ।उनी नेपाल पत्रकार महासंघको पूर्व केन्द्रीय पार्षदसमेत रहिसकेका छन् । त्यस्तै, नेपाल पत्रकार महासंघ शाखा सप्तरीका सह–सचिवसमेत रहेका चन्दनकुमार यादवले पनि राजविराज नगरपालिका– २ का वडाअध्यक्ष पदमा मनोनयन पत्र दर्ता गराएका छन् ।नेकपा माओवादी केन्द्रबाट मनोनयन पत्र दर्ता गराएका उनी सप्तरी टाइम्स्का सम्पादक हुन् । पत्रकार सतीश कुमार दत्त स्थानीय तह निर्वाचनका लागि आफ्नै वडामा प्रतिस्पर्धी बनेका छन् ।
नेकपा एकिकृत समाजवादी पार्टी (एस)बाट राजविराज वडा नम्वर ८ को अध्यक्ष पदमा दत्तले मनोनयन पत्र दर्ता गराएका छन् । उनी राजविराजबाट मैथिली भाषामा प्रकाशित मिथिला साप्ताहिकका सह–सम्पादक रहेका छन् । त्यस्तै, भोरुकवा एफएमका समाचार वाचक तथा मधेशलाइभ डटकम अनलाइनका संवाददाता कमलकुमार मण्डल पनि निर्वाचनमा प्रत्याशी बनेका छन् । तिलाठी कोइलाडी गाउंपालिका–२ का अध्यक्ष पदमा मण्डलले जनमत पार्टीबाट मनोनयनपत्र दर्ता गराएका छन् ।
