जनकपुर टुडे

२०७९ कार्तिक ३, बिहीबार ०७:३१

निर्वाचनलाई लक्षित गरी बाराको डुमरवानामा अपाङ्गता भएका व्यक्तिहरुका लागि मतदाता शिक्षा एवम् नमुना मतदान कार्यक्रम सम्पन्न भएको छ ।

मतदान केन्द्र कसरी पहुँचयुक्त बनाउने भन्ने सन्देश दिने उद्देश्यले सञ्चालन भएको यस कार्यक्रम युएस एड र आइएफइयसको आर्थिक सहयोग तथा नेत्रहीन युवा संघ नेपाल केन्द्रीय कार्यालयको प्रायोजनमा नेत्रहीन युवा संघ नेपाल जिल्ला शाखा बाराको आयोजनमा सम्पन्न भएको हो । प्रतिनिधिसभा र प्रदेशसभा सदस्य निर्वाचनका लागि मतदान गर्न योग्य १८ देखि २२ वर्ष उमेर समूहका व्यक्तिहरु तथा अपाङ्गता भएका व्यक्तिहरुलाई मुख्य प्राथमिकतामा राखी कार्यक्रमको आयोजना गरिएको थियो । श्री नेपाल राष्ट्रिय माध्यमिक विद्यालय डुमरवानामा संचालित कार्यक्रममा करिब ६० भन्दा बढीको उपस्थिति रहेको थियो । निर्वाचन प्रकृयाकै ढाँचामा कार्यक्रम आयोजना गरिएको र कार्यक्रममा नमुना मतदान प्रक्रियामा विद्यालयका प्रधानाध्यापक अक्षय कुमार चौधरीलाई मतदान अधिकृत र सोही विद्यालयका अर्का शिक्षक रोहित चौधरीलाई सहायक मतदान अधिकृत बनेका थिए ।

कार्यक्रममा ५०% भन्दा माथिको हाराहारीमा विभिन्न प्रकृतिका अपाङ्गता भएका व्यक्तिहरुको सहभागिता रहेको थियो । नमुना मतदानमा अन्य सहभागी साथै विद्यालयका शिक्षक कर्मचारी केही स्थानीय लगायत सञ्चारकर्मीहरुले पनि नमुना मतदान कार्यक्रममा सहभागिता जनाएका थिए । कार्यक्रममा झण्डै ६० भन्दा बढी मत खसेकोमा १७ मत बदर भएको थियो । यस्ता कार्यक्रमहरु स्थानीय तह निर्वाचन २०७९ देखि आसन्न निर्वाचनसम्म चल्ने यसै परियोजना अन्तर्गत बारामा रही कार्य गर्दै आएका कार्यक्रम संचालक विष्णु दाहालले जानकारी दिए ।