२०७९ मंसिर २१, बुधबार ०७:३५
सप्तरी । सप्तरीको राजविराजमा अव्यवस्थित, दुर्गन्धित र शौचालय विना ल्याबहरू सञ्चालन गरिएको छ।
महदेवा गाउँपालिका–४ का नजवुन खातुन बिरामी नातीको दिसा जाँच गराउन मंगलम डायग्नोस्टिकमा पुगेका थिए । डाक्टरले दिसा जाँच गराउन लगाएपछि उनी ल्याबमा पुगेका थिए । उनले जाँच गराउन गएको ल्याबमा शौचालय नहुँदा ल्याब अगाडिकै सडकमा उनले नातीलाई दिसा गराउनु परेको थियो । उनलाई ल्याबमा ट्वाइलेट नभएका कारण बच्चालाई सडकमा दिसा गराउनु परेको थियो । यहाँ धेरै ल्याबहरू यसैगरी चल्ने गरेका छन् । राजविराजको अति व्यस्त मुख्य सडकदेखि पाँच मिटरभित्र ल्याब छ । योसँगै ऐनसेल सेन्टर, बैङ्क शाखाहरू, होटलहरू र अन्य थुप्रै ठूलठूला व्यवसाय पनि सञ्चालन रहँदै आएका छन् । यो ल्याबमा दैनिकजसो आउने गरेका सयौँ सेवाग्राहीहरूमध्ये अधिकांशले ल्याब अगाडिको सय मिटर लामो सडकमा दिसापिसाब गर्छन् । ल्याबटेस्टका लागि ल्याइएका बालबालिकालाई ट् वाइलेट उपलब्ध नगराउँदा ल्याबटेस्टका लागि ल्याइएका बालबालिकालाई सडकमै दिसापिसाब गराउँदै गरेको दृश्यहरू देख्न पाइन्छ। ल्याबबाट निस्किने दिसापिसाब जस्ता दुर्गन्धित फोहोरहरू समेत सडकमै फाल्ने गरिन्छ । नाम नबताउने शर्तमा त्यहीँका एक पसल सञ्चालकले बताए । ल्याब सञ्चालक डाक्टर अमित शाहले ल्याबभन्दा अलिपर शौचालय रहेको बताए । उनले साँचो दिएर ल्याबमा आउने सेवाग्राहीलाई ट्वाइलेट पठाउने गरेको दाबी गरे। राजविराजमा दर्जनभन्दा बढी ल्याबहरूमा शौचालय नभएको अवस्थामा सञ्चालन भइरहेका छन्। यसले शहरलाई नै दुर्गन्धित बनाएको छ।
