अपडेट 
२०७९ मंसिर २९, बिहीबार ०७:३६

सर्लाहीको लालबन्दी नगरपालिका–३, जब्दी र ईश्वरपुर नगरपालिका–८, रामपुरलाई जोड्ने गरी फूलजोर खोलामा निर्माणाधीन पुलको काम अन्तिम चरणमा पुगेको छ।

वर्षौदेखि प्रतीक्षारत सो पुलको निर्माण कार्य पूरा हुन लाग्दा स्थानीय खुशी भएका छन्। पुल नहुँदा वर्षामा खोला वारपार गर्न समस्या हुने गरेको थियो। अब पुलबाटै आवतजावत गर्न मिल्ने भएपछि स्थानीय खुशी भएका छन्। जब्दीका स्थानीय अर्जुन चौधरीले पुल निर्माण भएसँगै वर्षायाममा जोखिम मोलेर बाढीमा हेलेर खोला वारपार गर्नुपर्ने बाध्यता अन्त्य भएको बताए। ईश्वरपुर नगरपालिकाको रामपुर,बयलबास, रामनगर, बेला, मनहर्वा र चन्द्रनगर गाउँपालिकाका बासिन्दाले लालबन्दी बजारसम्म आउन छोटो दूरीमा पर्ने भएकाले फुलजोर खोला तरेरै आउने गरेका छन्। बाढी आएको बेला भने बयलबासबाट पूर्व–पश्चिम राजमार्गस्थित फूलजोर चोकमा निस्किएर लालबन्दी आउनुपर्ने बाध्यता थियो। ईश्वरपुर नगरपालिका–८ का वडाध्यक्ष श्याम थापाले दुई हप्ताभित्रमा पुलको निर्माण कार्य पूरा हुने जानकारी दिए ।

अघिल्लो वर्ष असारमा पुल ढलान गरेकै राति खोलामा बाढी आएर पुलको केही भाग बगाएपछि लामो समयसम्म निर्माण रोकिएको थियो। ठेकेदारलाई निरन्तर ताकेता गरेर पुलको कामलाई अन्तिम चरणमा पुर्याइएको वडाध्यक्ष थापाले बताएका छन् । उनका अनुसार पुल निर्माणका लागि शुरुमा १४ करोड रुपैयाँमा ठेक्का लागेको थियो।

Comment

Related News

Latest News

Trending News