अपडेट 
२०७९ पुष ६, बुधबार १०:३०

मलेसियाबाट अब नेपालमा वार्षिक एक लाख पर्यटक आउने भएका छन् । बुधबार मलेसियामा नेपाल पर्यटन बोर्ड र त्यहाँको केके सुपरमार्टसँग सम्झौतका क्रममा मलेसियाका पर्यटनमन्त्री वाइबी डाटो सेरिटिङ किङ सिङले अब मलेसियाबाट वार्षिक एक लाख पर्यटक नेपाल आउने घोषणा गरेका हुन् ।

बोर्डका प्रमुख कार्यकारी अधिकृत सीइओ डा.धनन्जय रेग्मीका अनुसार मलेसियाका पर्यटनमन्त्री किङ सिङले नै अहिले कम पर्यटक नेपाल गएकोमा अब वार्षिक कम्तीमा एक लाख मलेसियाका पर्यटकले नेपाल भ्रमण गर्ने घोषणा गरेका हुन् ।

यसका लागि मलेसियाका करिब चार सय भन्दा धेरै ठाउँमा नेपालका पर्यटकीय क्षेत्रबारे प्रचारप्रसार हुनेछ । केके सुपरमार्टसँगको सम्झौताअनुसार अब त्यहाँका सयौँ मार्टमा नेपालको पर्यटकीय क्षेत्रबारे बनाइएको भिडियो र फोटो प्रदर्शन हुनेछ ।

यसले नेपालको पर्यटनमा ठूलो टेवा पुग्ने पनि बोर्डका सीइओ डा.रेग्मीको भनाई छ ।

‘के के सुपरमार्टसँगको सम्झौताले अब नेपालको पर्यटकीय क्षेत्रबारे मलेसियाका सयौँ ठाउँमा प्रचार हुने भएको छ’ बोर्डका कार्यकारी अधिकृत रेग्मीले मलेसियाबाट टेलिफोनमा भने, ‘मलेसियाका पर्यटनमन्त्री आफैँ आएर अब नेपालमा वार्षिक एक लाख पर्यटक पठाउने घोषणा गर्नु भएको छ । यो नेपाली पर्यटन क्षेत्रका लागि ठूलो उपलब्धी हो ।’

रेग्मीका अनुसार अहिले मलेसियाबाट वार्षिक कम्तीमा २२ हजार पर्यटक मात्रै नेपाल आइरहेका छन् । अब यो संख्या ह्वात्तै बढ्नेछ । नेपालका पर्यटकीय क्षेत्रको भ्रमण प्याकेज लिएर मलेसिया पुगेको बोर्डका सीइओ डा.रेग्मी नेतृत्वको टोलीले मलेसियाका क्वालालाम्पुर लगायतका सहरमा ‘नेपाल सेल्स मिसन’ पनि सम्पन्न गरेको छ ।

Comment

Related News

Latest News

Trending News