अपडेट 
२०७९ पुष २२, शुक्रबार ०८:०४

मधेश प्रदेशमा सरकार गठन सम्बन्धमा नेपाली कांग्रेसका सभापति शेरबहादुर देउवा र जनता समाजवादी पार्टी(जसपा) का अध्यक्ष उपेन्द्र यादवबीच बिहीबार विहान देउवा निवास धुम्बराहीमा भेट वार्ता भएको छ ।

संघीय सरकारको प्रधानमन्त्री प्रचण्डलाई समर्थन गरेका यादवले मधेश प्रदेशमा काँग्रेससित मिलेर सरकार बनाउन सक्ने संकेत गरेका छन् । मधेश प्रदेशमा जसपाले सरकारको नेतृत्व चाहेको छ । सरकारको नेतृत्व गर्न जसपालाई कांग्रेस र एमाले मध्ये एउटाको समर्थन अनिवार्य छ । संघीय सरकारमा सहभागी नभएको जसपाले मधेश प्रदेशमा सरकार बनाउन माओवादीले प्रतिबद्धता नजनाए प्रचण्ड नेतृत्वको सरकारमा सहभागी नहुने घुमाउरो निर्णय राजनीतिक समितिबाट गरेको छ । गत असोजको अन्तिम हप्ता नेपाली कांग्रेस नेतृत्वको गठबन्धन छाडेपछि पहिलो पटक सभापति देउवासित यादवले भेटेका हुन् । चुनावमा एमालेसित तालमेल गरेका यादवले चुनावको परिणाम घोषणा भएसँगै तालमेल समाप्त भइसकेको धारणा सार्वजनिक गरेका थिए । देउवासितको यादवको भेटलाई राजनीतिक वृत्तमा अर्थपूर्ण मानिएको छ । मधेश प्रदेशको दोस्रो ठूलो दल कांग्रेससँग २२ प्रदेशसभा सदस्य छन् । जसपासँग १६ र लोकतान्त्रिक समाजवादी पार्टी (लोसपा) सँग ९ प्रदेशसभा सदस्य छन् । १०७ सदस्यीय प्रदेशसभामा बहुमतका लागि ५४ प्रदेशसभा सदस्यको साथ चाहिन्छ । मधेश प्रदेशमा ६ जना स्वतन्त्र सभासद छन् । उनीहरुको साथ पनि जसपा, कांग्रेस गठबन्धनले पाउन सक्ने संभावना छ ।

Comment

Related News

Latest News

Trending News