२०७९ फाल्गुन ३०, मंगलवार ०८:०३
नेपाली कांग्रेसका नेता तथा प्रतिनिधिसभा सदस्य रमेश रिजालले नेपाली कांग्रेस एक साताभित्र सरकारमा सहभागी हुने सम्भावना रहेको बताएका छन् ।
सञ्चारकर्मीसँग कुराकानी गर्दै उनले चैतको ५ वा ६ गतेभित्र कांग्रेसमा सहभागी हुने सम्भावना रहेको बताए । ‘कुन–कुन मन्त्रालय लिने र क–कस्लाई मन्त्री बनाउने विषयमा पार्टीभित्र र सरकारमा सहभागी दलहरुसँग छलफल भइरहेको छ’,उनले भने,‘ उपराष्ट्रपतिको चुनाव सकिने वित्तिकै हामी सरकारमा जान्छौं।’ नेपाली कांग्रेसले नौ वा १० मन्त्रालय लिएर सरकारमा जाने करीब–करीब सहमति भएको उनले बताए। ‘कुन नेताको नेतृत्वमा सरकारमा जाने विषयमा कुनै ठोस निर्णय भइसकेको छैन’, उनले भने, ‘पार्टीले जसको आवश्यकता देख्छ, सरकारको नेतृत्व उसैले गर्छ, तर पार्टीले निर्णय गरिसकेको छैन।’
आठ दलीय गठबन्धनबाट उपराष्ट्रपतिका लागि तीनजनाको उम्मेदवारी परे पनि अन्तिम समयसम्ममा एकजना उम्मेदवारमा सहमति हुने जिकिर गर्दै उनले यस विषयमा गठबन्धन आबद्ध दलबीच प्रयास भइरहेको बताए । राष्ट्रपतिमा निर्वाचित रामचन्द्र पौडेल तटस्थ भूमिका निर्वाह गरेको भन्दै नेता रिजालले राष्ट्रपति पौडेलबाट प्रजातन्त्रको स्थायित्व र संविधानको रक्षा हुने उल्लेख गरे ।
