२०८० भाद्र ८, शुक्रबार ०८:०७
बैंकबाट ऋण निकालेर बसमा बसेकी एक वृद्धा नाटकीय ढंगबाट लुटिएकी छन् । सप्तरीको कंचनरुप नगरपालिका ११ ठेलियाकी ६५ वर्षीया मंगलीदेवी चौधरी लुटिएकी छन ।
उनीबाट १ लाख ९० हजार रुपैयाँ लुटिएको पीडित वृद्धाका श्रीमान बसन्त चौधरीले बताए । श्रीमानको उपचार तथा नाती नातिनीको बाँकी बक्यौता विद्यालय शुल्क बुझाउनका लागि उनले बिहीबार कंचनरुप नगरपालिकास्थित मेरो माइक्रो फाइनान्स वित्तीय संस्था लिमिटेडमा जग्गा धितो राखेर १ लाख ९० हजार रुपैयाँ ऋण निकालेकी थिइन् । सो रकम झोलामा राखी उनी काम विशेषले सदरमुकाम राजविराज पुग्न विष्णु ट्राभल्स नामक बसमा चढेकी थिइन् । वृद्धा चौधरीका अनुसार वित्तीय संस्थाबाट रकम लिएर बसमा चढ्दासम्म अपरिचित दुई÷तीन जनाले पछ्याएका थिए । आफू चढेको बसमा ती अपरिचित युवाहरु चढेको उनले सुनाइन् ।
बीच बाटोमै बडो चलाखीपूर्ण तरिकाले आफूलाई थाहै नहुने गरी झोला काटेर ती रकम निकालेर लगेको उनले प्रहरी समक्ष रुदै सुनाइन् । आफू रुपनी चोकमा बसबाट ओर्लिएपछि झोला चेक गर्दा मात्र रकम लुटिएको थाहा पाएको उनले सुनाइन् । उनी त्यही रित्तो झोला बोकेर बिहीबारै साँझ जिल्ला प्रहरी कार्यालय पुगेर प्रहरी अधिकारीहरुलाई रकम पत्ता लागाई दिन गुहार गरेकी छन ।
श्रीमानको उपचार तथा नाती नातीनिको विद्यालय शुल्कका लागि बैंकबाट निकालिएको ऋण लुटिएपछि बिचल्लीमा परेको सुनाउँदै उनले अब श्रीमानको उपचार र नाती नातीनीको विद्यालय शुल्क कसरी तिर्ने भन्ने चिन्ता व्यक्त गरेकी छन् । व वृद्धाको बयानको आधारमा अपराधी पत्ता लगाउने काम सुरु गरिएको जिल्ला प्रहरी कार्यालय सप्तरीले जनाएको छ ।
