अपडेट 
२०८० कार्तिक २, बिहीबार ०८:०९

बिरामी लिन हिडेको एम्बुलेन्सलाईसमेत बीच बाटोबाटै फर्किन बाध्य बनाएपछि समयमै उपचार नपाएर बुधबार उक्त बिरामीको ज्यान गएको छ ।

सप्तरीको डाक्नेश्वरी नगरपालिका ६ औरहीका १४ वर्षीय गौतमकुमार साहको ज्यान गएको छ । बुबा रामकृष्णका अनुसार बुधबार बिहान ११ बजेतिर गौतम बिरामी परेका थिए । अवस्था गम्भीर देखिएपछि उपचारका लागि बाहिर लैजान उनले डाक्नेश्वरी नगरपालिकामा रहेको एम्बुलेन्स बोलाएका थिए ।

चालक रामजतन मुखियाँ तत्कालै बिरामीलाई लिन एम्बुलेन्स लिएर त्यसतर्फ हिँडे । तर, नगरपालिका कार्यालयबाट २ सय मिटर दूरीमा मात्र पुग्दा गाउँकै पोखरीको ठेक्का विवादलाई लिएर प्रदर्शनमा उत्रेका प्रदर्शनकारीहरुले एम्बुलेन्सलाई रोके । आफू बिरामी लिन हिँडेको जति सम्झाउँदा बुझाउँदा पनि प्रदर्शनकारीले मानेनन्, चालक मुखियाले भने उल्टै म माथि हातपात गर्दै एम्बुलेन्स नै तोडफोड गर्न थालेपछि बीच बाटो बाटै फर्किन बाध्य भए । उनले सय डेढसयको संख्यामा रहेका प्रदर्शनकारीले बाटो नै जाम गरिदिएको र कुनै पनि हालतमा जान नदिने अडान राख्दै आक्रमणमा उत्रेपछि आफू फर्किन बाध्य भएको सुनाए ।

डाक्नेश्वरी नगरपालिकाका नगर प्रमुख रामलखन मुखियाले प्रदर्शनकारीहरु अराजक तथा अमानवीय शैलीमा प्रस्तुत हुँदा समयमै उपचार नपाइ बिरामीको ज्यान गएको बताए । उनले नगरकै एक पोखरी ठेक्का सम्बन्धी विवादमा एक पक्षले अराजकता मच्याउँदै नगरपालिकाको कार्यालय भवनमा समेत ढुंगामुढा गरेको बताए । समयमै उपचार नपाई मृत्यु भएका बिरामीको शव स्थानीय गजेन्द्र नारायण सिंह अस्पताल पु¥याइ घटना बारे थप अनुसन्धान भइरहेको प्रहरीले जनाएको छ ।

यता प्रदर्शनकारीले एम्बुलेन्सलाईसमेत रोकेर गम्भीर अपराध गरेको भन्दै स्थानीयले प्रदर्शनकारीको पहिचान गरी कडा कारबाहीको माग गरेका छन् ।

Comment


Related News