२०८० कार्तिक २२, बुधबार ०७:३५
नेपालीहरुको चाडपर्व उत्कर्षमा रहेको बेला जनप्रतिनिधिहरुको विवादका कारण धनुषाका पाँचवटा पालिकाका एकहजार भन्दा बढी कर्मचारी तलव पाउन सकेका छैनन् । धनुषा जिल्लाका औरही गाउँपालिका, कमला नगरपालिका, मिथिला बिहारी नगरपालिका, जनकनन्दिनी गाउँपालिका र सबैला नगरपालिकाका कर्मचारीहरु चालु आर्थिक वर्षको तलव पाउन सकेका छैनन् ।
खाता नखुल्दा पालिकाको कार्यालय अस्तव्यस्त भएको छ । औरही गाउँपालिकाका प्रमुख र उप– प्रमुख एमालेका छन् । बहुमत कांग्रेससंग रहेको छ । मेयर र उपमेयरले एक प्रकारको बजेट ल्याउँदा बहुमत वडाध्यक्ष र सदस्यहरुले विरोध जनाएपछि असार १० सम्म हुनुपर्ने नगरसभा हुन सकेको छैन् । नगरसभा हुन नसक्दा खाता सञ्चालन भएको छैन् । दुई सय भन्दा बढी कर्मचारीहरु तलव सुविधा पाउन सकेका छैनन् । औरही गाउँपालिकाका प्रमुख उमाशंकर प्रसाद साहले नगरसभा कहिले हुने त्यो आफूलाई थाहा नरहेको बताए । उनले भने–‘ नगरसभा कहिले हुन्छ त्यो मलाई थाहा भएन ।
कर्मचारी तलव खाओस नखाओस आपूmलाई मतलब भएन् ।’ धनुषाको कमला नगरपालिकाले पनि खाता सञ्चालन गर्न सकेको छैन् । त्यहाँ प्रमुख प्रशासकीय अधिकृत नरहेको र छिट्टै आउने सूचना अधिकारी वीरेन्द्रकुमार सधानले बताए । यहाँ पनि मेयर र उपमेयरबीच विवाद छ । यहाँ मेयर र उपमेयरमा विवाद रहेकै कारण कर्मचारी टिक्दैनन् ।
कर्मचारी आए पनि नगरसभा गर्न कठिनाइ रहेको बताइएको छ । मेयर विशेश्वर यादव र उप मेयर शीला देवी मण्डलबीचको आन्तरिक कलहका कारण नगरपालिकाका दुई सय भन्दा बढी कर्मचारी चालु आर्थिक वर्षदेखि तलव सुविधा पाएका छैनन् । मिथिला बिहारी नगरपालिकामासमेत मेयर र उपमेयरबीचको विवादका कारण नगरसभा हुन सकेको छैन् । मेयर नेपाली कांग्रेसका र उपमेयर नेकपा माओवादी केन्द्रका छन् । दुबैजना गठबन्धनका उम्मेदवार थिए र विजयी पनि भए ।
नगरपालिकामा असार १० भित्र वडास्तरीय योजना नआएका कारण सभा गर्न ढिलाइ भएको थियो । पछि वडाको योजना आएपछि नगरस्तरीय बजेटमा उपमेयर शोभा देवी साहले विवाद झिकेपछि मेयर राजेन्द्रप्रसाद यादवलाई भने समस्या भएको हो । मेयर यादवले नगरस्तरीय बजेट छुट्टयाउँदा त्यसको योजना पेश गर्न उपमेयर साहले भनेपछि त्यहाँ विवाद उत्पन्न भएकै कारण नगरसभा हुन सकेन् । यहाँ पनि दुई सय भन्दा बढी कर्मचारी तलव पाउन सकेका छैनन् ।
प्रमुख प्रशासकीय अधिकृत रामदरश यादवले नगरसभा नभएको जानकारी दिँदै दशै बितिसक्यो, दीपावली र छठ आउँदैछ अहिलेसम्म कर्मचारीलाई तलव दिन नसकेको दुःख व्यक्त गरे । जनकनन्दिनी गाउँपलिकामा लेखा अधिकृत नहुँदा त्यहाँको बजेट सूत्रमा हाल्न सकिएको छैन् । त्यसकारण कर्मचारीले तलव पाउन सकेका छैनन् । जनकनन्दिनी गाउँपालिकामा पनि दुई सयको हाराहारीमा कर्मचारी रहेको सूचना अधिकृत ऋषिकेश यादवले बताए । ‘गाउँपालिकाको नगरसभा समयमै भए पनि लेखा अधिकृत नरहेका कारण समस्या आएको हो’ उनले भने, लेखा अधिकृत आएपछि तलव खुवाउने योजनामा गाउँपालिका रहेको छ ।
त्यस्तै सवैला नगरपालिकाले सोमबार बैठक गरेको प्रमुख प्रशासकीय अधिकृत कृष्ण पौडेलले जानकारी दिए । उनले छिट्टै बजेट सूत्रमा हाल्ने र तलव सुविधा तथा योजनाहरु सञ्चालनमा ल्याउने बताए । सबैलामा पनि जनप्रतिनिधिबीच विवाद रहेकै कारण नगरसभा असार १० भित्र हुन सकेन् ।
कोष तथा लेखा नियन्त्रण कार्यालयका प्रमुख नवराज नेपालले १८ मध्ये १३ वटाको नगरसभा सम्पन्न भइ बजेट सूत्रमा हालिएको र पाँच वटा पालिकाले अहिलेसम्म सूत्रमा नआएको जानकारी दिए । उनले गणेशमान चारनाथ नगरपालिका, जनकपुरधाम उप– महानगरपालिका, धनौजी गाउँपालिका, हँसपुर नगरपालिका, मुखियापट्टी मुसहरनीया गाउँपालिका, मिथिला नगरपालिका, क्षीरेश्वरनाथ नगरपालिका, शहीदनगर नगरपालिका, बटेश्वर गाउँपालिका, लक्ष्मीनिया गाउँपालिका, धनुषाधाम नगरपालिका, नगराइन नगरपालिका र विदेह नगरपालिकाको बजेट सूत्रमा आइसकेको जानकारी दिए ।
