२०८० मंसिर १२, मंगलवार ०८:२२
राष्ट्रिय स्वतन्त्र पार्टी (रास्वपा)को तीन दिने केन्द्रीय कार्यसमितिको बैठक महोत्तरीको जलेश्वरमा सुरु भएको छ ।
गत निर्वाचनमा राजनीतिक दलको रुपमा स्थापित भएका रास्वपाले प्रतिनिधिसभाका लागि मात्रै उम्मेदवारी दिएका थिए । सो पार्टीले संघीयता मुलुकको लागि आवश्यक नरहेको भन्दै न त उम्मेदवार नै दिए न त प्रदेश सांसदलाई मतदान नै गरेका थिए । मधेश प्रदेशमा कमजोर रहेका रास्वपाले मधेशको सेन्टिमेन्ट लिनका लागि जलेश्वरमा बैठक बसेको हुनसक्ने अनुमान गरिएको छ ।
मधेशमा सो पार्टीलाई जनताले रुचाएका थिएन् । अधिकांश कार्यक्रमहरु बर्दिबासमा हुने गरेको अवस्थामा रास्वपाले जलेश्वरमा बैठक बस्नु भनेको मधेशको सेन्टिमेन्ट बटुल्ने रहेको राजनीतिक विश्लेषकहरुको भनाइ छ । पार्टीको केन्द्रीय समिति र संसदीय दलको बैठक सोमबार दिउँसो साढे १२ मा सुरु भएको बैठकमा केन्द्रीय सदस्यहरु, सांसदहरु, संगठन, कानुन तथा न्याय, प्रशिक्षण विभागका पदाधिकारी सहभागी थिए ।
बैठकमा रास्वपाको मधेश प्रदेश सभापति र महामन्त्री पनि सहभागी भएका थिए । पार्टी स्थापना यता रास्वपाको यो सबैभन्दा बृहत्त बैठक रहेको पार्टीको दाबी छ । बैठकको प्रारम्भमा महामन्त्री मुकुल ढकालले समसामयिक राजनीतिक तथा पार्टी गतिविधिको जानकारी गराए । महामन्त्रीपछि प्रदेशका सभापतिहरुले संगठनात्मक प्रतिवेदन प्रस्तुत गरेका थिए ।
सोमबार नै केन्द्रीय अनुशासन आयोगको प्रतिवेदन विभागका प्रमुख डा. भरतमणि देवकोटाले पेश गर्ने कार्यसूची रहेको थियो । सोमबार नै पार्टी सभापतिबाहेक २० सांसदलाई ७ मिनेटका दरले बोल्न समय दिइएको थियो । त्यस्तै पार्टी उपसभापति डोलप्रसाद अर्यालले आर्थिक तथा लेखा प्रतिवेदन पेश गरेका थिए भने आर्थिक व्यवस्थापन विभाग प्रमुख लिमा अधिकारी र लेखा आयोगका प्रमुख अभिषेक घिमिरेले उक्त प्रतिवेदनमाथि धारणा राखेका थिए ।
संगठन विभागका प्रमुख तथा सहमहामन्त्री कविन्द्र बुर्लाकोटीले सांगठनिक प्रतिवेदन पेश गर्ने भएका छन् । मंगलबार विहान केन्द्रीय समिति र संसदीय दलको छुट्टाछुट्टै बैठक पनि बस्नेछ । केन्द्रीय समिति र संसदीय दलको संयुक्त बैठक भने विहान ११ बजेबाट सुरु हुनेछ । बैठकमा प्रमुख सचेतक सन्तोष परियारले संसदीय दलको गतिविधिबारे एक प्रतिवेदन पेश गर्नेछन् ।
मंगलबार नै सभापति रवि लामिछानेले राजनीतिक प्रतिवेदन पेश गर्ने रास्वपाले जनाएको छ । महामन्त्री ढकाल र सहमहामन्त्री बुर्लाकोटीले महाधिवेशनको कार्यविधि र प्रक्रियासहितको प्रतिवेदन मंगलबार पेश गर्नेछन् । मंगलबार नीति विचार प्रतिनिधिमण्डलको बैठक पनि बस्नेछ । तेस्रो दिन बुधबार विहान ७ बजे सुरु हुने बैठक साढे १२ बजेमा सक्ने कार्यतालिका छ । महाधिवेशन कार्यविधि तथा प्रक्रियामाथि दुई घण्टाभित्र सहभागीहरुले धारणा राख्नेछन् । त्यसलगतै, नीति र विचारमाथि बोल्नका लागि एक घण्टाको समय छुट्याइएको छ ।
