२०८० माघ २१, आईतवार ०८:०४
धनुषाको बटेश्वर गाउँपालिकास्थित श्री शिवशक्ति माध्यमिक विद्यालयले पहिलो पटक आयोजना गरेको पालिकास्तरिय वक्तित्वकला प्रतियोगितामा सोही विद्यालय कक्षा दशकी छात्रा चाँदनी कुमारी प्रथम भएकी छन् ।
विद्यालय तहका बालबालिकाहरुको चौतर्फी विकासका लागि शिवशक्ति माध्यमिक विद्यालयले ‘सामुदायिक विद्यालयको वर्तमान अवस्था , चुनौती र सम्भावना’ शिर्षकमा शुक्रबार पहिलो पटक आयोजना गरेको पालिकास्तरिय वक्तित्वकला प्रतियोगिता सोही विद्यालयकी छात्रा चाँदनी कुमारी प्रथम भएकी हुन् ।
यस्तै द्वतीयमा शिवशक्ति मावि कक्षा दशकी छात्रा सपनाकुमारी महतो र तृतीय जनप्रिय माविकी छात्रा नेहा यादव भएकी छन् । उक्त वक्तित्वकला प्रतियोगितामा पालिकाका चारवटा सामुदायिक माध्यमिक विद्यालयका विद्यार्थीहरुलाई सहभागी गराइएको थियो । जसमा तीन छात्र र पाँच जना छात्रा गरी जम्म आठ जना विद्यार्थीहरुलाई रहेका थिए । ‘सामुदायिक विद्यालयको वर्तमान अवस्था , चुनौती र सम्भावना’ शिर्षकमा प्रतियोगितामा सहभागी विद्याथीहरुले आफ्नो प्रस्तुति दिएका थिए । पालिकास्तरिय वक्तित्वकला प्रतियोगितामा उपस्थित बटेश्वर गाउँपालिकाका उपप्रमुख फुलकुमारी महतोले विद्यालयमा अतिरिक्त क्रियाकलापलाई निरन्तरता दिनुपर्ने बताए ।
उनले यस्ता क्रियाकलापले विद्यालयमा विद्यार्थीहरुको रुचि समेत बढ्नुका साथै विद्यार्थीहरुको व्यक्तित्व विकासमा पनि मदत पुग्ने हुँदा पालिकाको प्रत्येक विद्यालयमा यस्ता क्रियाकलाप गर्न आवश्यक रहेको उल्लेख गरे । विद्यालय तहका बालबालिकाका लागि वक्तित्वकला प्रतियोगिता आवश्यक रहेको भन्दै पालिकाका शिक्षा शाखा प्रमुख रामलाल महतोले आगामी दिनमा पालिकाको अन्य विद्यालयमा यस्ता कार्यक्रमको आयोजना गर्नुपर्ने बताए ।
उनले यो प्रतियोगिताले विद्यालर्थीहरुले आफ्नो क्षमता समेत प्रस्तुत गर्ने मञ्च पाउने हुँदा यस्ता कार्यक्रमलाई निरन्तरता दिने बताए ।
यस्तै विद्यालय व्यवस्थापन समितिका अध्यक्ष बिन्दीलाल महतोले पालिको चारवटा मावि विद्यालयमध्ये शिवशक्ति माविले विगतका दिनभन्दा विद्यालयका गतिविधिमा सुधारसँगै विद्यालयका अन्यक्रियाकलापले पनि तिव्रता लिएको बताए । वक्तित्वकला प्रतियोगिताले बालबालिकामा बोल्ने क्षमताको विकास समेत हुने हुँदा यस्ता कार्यक्रम अन्य विद्यालयमा सञ्चालन गर्नमा जोड दिनुपर्ने बताए ।
विद्यालयका प्रधानाध्यापक प्रमोदशरण केवटले बालबालिकाको व्यक्तित्व विकासका लागि विद्यालयमा हाजिर जवाफ, वक्तित्वकला, चित्रकला, सांगीतिक कार्यक्रम हुन आवश्यक हुँदा यस विद्यालयले प्रत्येक शुक्रबार नियमित अतिरिक्त क्रियाकलाप गराउने गरेको छ । विद्यालयमा गराईने यस्ता क्रियाकलापले विद्यार्थीहरुको पढाइमा रुचि समेत देखिएको बताए । उनले भने विद्यालय स्तरका बालबालिकोको चोतर्फी विकासका लागि लागि विद्यालयमा गराइने अतिरिक्त क्रियाकलापको पनि महत्वपूर्ण भूमिका रहेका हुन्छ । यसले भविष्यमा विद्यार्थीहरुलाई मासमा गएर निर्धक्क भएर बोल्ने बानीको समेत विकास हुन्छ । त्यसकारण शैक्षिक अवस्था सुधारको लागि पढाई सँगै अतिरिक्त क्रियाकलापमा पनि सरोकारवाला निकायले ध्यान दिनुपर्ने बताए ।
प्राध्यापक केवटले यस्ता क्रियाकलाप आगामी दिनमा विद्यालयमा निरन्तर सञ्चालन हुने समेत बताए । विद्यालय व्यवस्थापन समितिका अध्यक्ष महतोको अध्यक्षतामा आयोजित उक्त वक्तित्वकला प्रतियोगितामा शिवशक्ति विद्यालय व्यवस्थापन समितिका सदस्य, सल्लाहकार समितिका सदस्य, विद्यालयका विद्यार्थी तथा शिक्षकहरुको सहभागिता रहेको थियो ।
