अपडेट 
२०८१ बैशाख १७, सोमबार १९:२३

गृह मन्त्रालयले गठन गरेको हतियारको इजाजत तथा नवीकरण सम्बन्धी छानबिन समितिले प्रतिवेदन बुझाएको छ ।

समितिले सोमबार उपप्रधान तथा गृहमन्त्री रवि लामिछानेलाई प्रतिवेदन बुझाएको हो।

प्रतिवेदनमा व्यक्तिगत रुपमा हतियारको इजाजत प्राप्त गर्ने मापदण्ड, कानूनमा सुधार, अभिलेख व्यवस्थापन कार्य, घटनामा संलग्न व्यक्तिलाई कारबाही लगायत विषयमा सुझाव तथा सिफारिस गरिएको छ ।

गत २०८० चैत ५ गते सर्वोच्च अदालत परिसरमा जिल्ला प्रशासन कार्यालय, झापाबाट मिति २०७५ असार २१ मा जारी भएको इजाजतपत्र २२ बोर ए३५४७५२ हतियार फेला परेपछि गृह मन्त्रीस्तरीय निर्णयबाट छानबिन समिति गठन भएको थियो ।

सर्वोच्च अदालत परिसरमा फेला परेको हतियार कानूनले तोकेअनुसार इजाजत दिन मिल्ने नदेखिएको र इजाजत दिने निर्णयमासमेत देशभर लैजान पाउने गरी नदिइएको प्रतिवेदनमा उल्लेख छ।

देशभर हतियारको इजाजत पत्र दिँदा, नवीकरण वा नामसारी गर्दा विद्युतीय प्रणालीको केन्द्रीय अभिलेखमा राख्न र नियमन गर्नसमेत प्रतिवेदनमा सुझाव दिइएको छ।

प्रतिवेदन बुझ्दै गृहमन्त्री रवि लमिछानेले समितिका सदस्यहरूलाई धन्यवाद दिए । प्रतिवेदनले औंल्याएका सुझाव र सिफारिस कार्यान्वयन गरिने पनि उनले बताए ।

व्यक्तिसँग रहेका हातहतियारको दुरुपयोग हुन नदिन र सर्वोच्च अदालतको आदेश कार्यान्वयनका लागि गर्नुपर्ने कामबारे सुझावसहितको प्रतिवेदन दिन चैत १५ गते गृह मन्त्रालयका सहसचिव राजेन्द्रदेव पाण्डेको संयोजकत्वमा ४ सदस्यीय समिति गठन भएको थियो।

Comment


Related News