२०८१ बैशाख ३१, सोमबार ०७:१६
सप्तरीको सप्तकोशी नगरपालिका–१, फत्तेपुरस्थित नेपाल बैङ्क लिमिटेडका सुरक्षागार्ड परशुराम फुयाँलको हत्यामा संलग्न भएको आरोपमा पक्राउ परेका एक जनालाई प्रहरीले सार्वजनिक गरेको छ ।
जिल्ला प्रहरी कार्यालय सप्तरीले हत्या आरोपमा पक्राउ परेका सप्तकोशी नगरपालिका–५, गंगाजलीका ३२ वर्षीय चन्द्रबहादुर सुवेदीलाई आइतबार सार्वजनिक गरिएको छ । सुवेदीलाई जिल्ला प्रहरी कार्यालय चितवनको सहयोगमा राप्ती नगरपालिका वडा नम्बर १ लोथर चितवनबाट शनिबार पक्राउ गरी जिल्ला प्रहरी कार्यालयमा ल्याइ अनुसन्धान भइरहेको जिल्ला प्रहरी कार्यालय सप्तरीका सूचना अधिकारी डिएसपी ढुण्डिराज न्यौपानेले बताए । उनका अनुसार तालिम प्राप्त कुकुर सहितको मधेश प्रदेश प्रहरी कार्यालय र जिल्ला प्रहरी कार्यालय सप्तरीको संयुक्त अनुसन्धान टोलीले बैंकमा रहेको सिसिटिभी फुटेजको अध्ययन विश्लेषण गरी उक्त घटनामा सुवेदीको संलग्नता देखिएकोले नियन्त्रणमा लिएको बताए । उनले अभियुक्त सुवेदीको साथबाट घटनामा प्रयोग भएको खुकुरी, घटनाको समयमा बोकेको झोला, लगाएको जुत्ता, पन्जा, सेन्डो, टोपी, सल र वरदात स्थलमा प्रयोग भएको काठ समेत बरामद गरिएको जिल्ला प्रहरी कार्यालय सप्तरीका सूचना अधिकारी डिएसपी न्यौपानेले बताए । सप्तकोशी नगरपालिका–२, सिद्धिपुरका ५६ वर्षीय फुयाँल बिहीबार बिहान बैङ्कमै मृत फेला परेका थिए । उनको खुकुरी प्रहार गरी हत्या गरिएको सप्तरी प्रहरीले यसअघि नै खुलाइसकेका थिए ।
नेपाली सेनाबाट सेवा निवृत्त भएपछि विगत ८ वर्षदेखि निरन्तर सुरक्षा गार्ड रहेका उनको शरीरमा खुकुरी प्रहार गरेको चोट र शवको वरिपरी रगतका टाटा फेला परेको थियो । उनी बैङ्क सुरक्षागार्ड कक्षमै मृत अवस्थामा फेला परेका थिए । फुयाँलको लुटेर ासँग निकैबेर मुठभेड भएको सिसिटिभी फुटेजमा देखिएको बैङ्कले जनाएको छ । फुयाँलको हत्या गरी बैङ्कबाट चोरी गर्ने प्रयास भने सफल नभएको बैङ्कले जनाएको छ । मृतक फुयाँलका श्रीमती २ छोरा र २ छोरी छन्
। सप्तरी प्रहरीका अनुसार घटनाको प्रारम्भिक अनुसन्धानबाट गार्डको धारिलो हतियार प्रयोग गरेर हत्या भएको देखिएकोले सो घटनाबारे अनुसन्धान भइरहेको प्रहरीले जनाएको छ ।
