२०८१ जेष्ठ १७, बिहीबार १५:३३
गृह मन्त्रालयले नेपाल प्रहरी र सशस्त्र प्रहरीको उमेर हद सम्बन्धी पुनरावलोकन गर्न कार्यदल गठन गरेको छ।
उपप्रधान एवं गृहमन्त्रीस्तरीय निर्णयअनुसार गृह मन्त्रालयका सहसचिव एवं कर्मचारी महाशाखा प्रमुख झक्कप्रसाद आचार्यको संयोजकत्वमा सात सदस्यीय कार्यदल गठन गरिएको हो।
कार्यदलमा नेपाल प्रहरी र सशस्त्र प्रहरी बल नेपालका डिआइजी, अर्थ मन्त्रालयका उपसचिव, गृह मन्त्रालयका कानुन उपसचिव, मन्त्रालयले तोकेको सुरक्षा विज्ञ र गृहका उपसचिव एवं प्रहरी कर्मचारी प्रशासन शाखा प्रमुख कृष्ण गैरे सदस्य सचिव छन्।
समितिलाई मौजुदा ऐन, नियमहरूको अध्ययन गरी अन्य मुलुकका अभ्यासहरू समेतको आधारमा एक महिनाभित्र सुझावसहितको प्रतिवेदन पेश गर्ने कार्यादेश दिइएको मन्त्रालयले जनाएको छ।
जेठ १५ गतेको बजेट भाषणमा पनि अर्थमन्त्री वर्षमान पुनले सुरक्षाकर्मीको सेवानिवृत्त हुने उमेर पुनरावलोकन गर्न अध्ययन गर्ने बताएका थिए।
प्रहरीमा आइजिपी ५८ वर्ष, एआइजी वा डिआइजी ५६ वर्ष, एसएसपी वा एसपी ५५, डिएसपी ५४ वर्ष, प्रहरी निरीक्षक ५३ वर्ष, प्रहरी वरिष्ठ सई वा सई ५२ वर्ष, असईको ५१ वर्ष, वरिष्ठ हवल्दार, हवल्दार, सहायक हवल्दार वा प्रहरी जवानको ४८ वर्षमा उमेरका कारण स्वत: अवकास पाउनेछन्।
