२०८१ जेष्ठ २३, बुधबार ०७:०८
जनता समाजवादी पार्टी (जसपा) नेपालको महाधिवेशनको लागि तयार पारिएको पण्डाल भत्किएको छ । जसपा नेपालको यही जेठ २८ गतेदेखि हुने एकताको प्रथम राष्ट्रिय महाधिवेशनको लागि जनकपुरधामस्थित तिरहुतिया गाछी मैदानमा निर्माणाधीन टेन्टसहितको पण्डाल भत्केको छ ।
एक महिना अघिदेखि निर्माणाधीन पण्डाल अन्तिम चरणमा हावाहुरीसहित भएको वर्षातका कारण भत्केको जनाइएको छ । जसपा नेपाल धनुषा अध्यक्ष पशुपति यादवले दिएको जानकारी अनुसार २० हजार जना नेता तथा कार्यकर्ता क्षमताको रहेको सो पण्डाल निर्माण अन्तिम चरणमा रहेको थियो ।
सोमबार राति भएको वर्षात र हावाहुरीले भत्केको जिल्ला अध्यक्ष यादवले बताए । उनले भव्यरुपमा निर्माणाधीन पण्डाल एक महिनादेखि दर्जनौँ मजदुरले निर्माण गरिरहेका थिए ।
अध्यक्ष यादवले सो पण्डाल पुनः निर्माण गरी तोकिएकै मितिमा महाधिवेशन सम्पन्न हुने बताए ।
