जनकपुर टुडे

२०८१ भाद्र ३१, सोमबार ०७:३९

जनकपुरधाम उद्योग वाणिज्य संघको अध्यक्ष पदमा सुरेन्द्र भण्डारी निर्वाचित भएका छन् । उनले आफ्ना निकटतम् प्रतिद्वन्दी मनिष रमण साहलाई ७२ मतले पराजित गर्दै १ हजार ६ सय ४४ मत ल्याएर जित हासिल गरेका छन् । उनका प्रतिद्वन्दी मनिषले १ हजार ५ सय ७२ मत पाएका छन् । तेस्रो उम्मेदवार जितेन्द्र प्रसाद साहले २ सय ९३ मत प्राप्त गरेका छन् ।

अध्यक्षमा ६३ वटा मत बदर भएको निर्वाचन समितिका संयोजक ललितकुमार साहले जनाएका छन् । गत चुनावमा मनिषले वरिष्ठ उपाध्यक्षमा भण्डारीलाई पराजित गरेका थिए । संघको वरिष्ठ उपाध्यक्षमा मनोज साह आफ्ना प्रतिद्वन्दी अम्भुप्रसाद साहसँग ६ सय ८५ मतान्तरले विजयी भएका छन् । उनले १ हजार ८ सय ११ मत ल्याएर जित हात पार्दा उनका प्रतिद्वन्दी अम्भु प्रसाद साहले १ हजार १ सय २६ र विकास कुमार चौधरीले ५ सय ५० मतमा चित्त बुझाए ।

त्यस्तै उपाध्यक्ष पदमा भने लक्ष्मण साह यसअघि नै निर्विरोध निर्वाचित भइसकेका छन् । महिला उपाध्यक्षमा रिंकु शाह १ हजार ६ सय ७२ मत ल्याई विजयी भएकी छन् । उनका प्रतिस्पर्धी माया साहले १ हजार १ सय ४४ र सरिता ठाकुरले ६ सय ५५ मत पाएकी छन् । त्यस्तै महासचिवमा फुलदेव पण्डितले १ हजार ५ सय ८३ मत प्राप्त गरी विजयी भएका छन् । उनका निकटतम् प्रतिद्वन्दी सुधिर पजियारले ७ सय ८९ मत ल्याए ।

अशोक चौधरीले ६ सय १९ र गणेश कुमार साहले ५ सय ५ मत प्राप्त गरेको निर्वाचन समितिले जनाएको छ । त्यस्तै सचिव पदमा नरेन्द्र विक्रम साह (निरज)ले १ हजार ३ सय ९६ मत ल्याई विजयी भएका छन् । उनका निकटतम प्रतिद्वन्दी गोपी कुमार साहले ९ सय ४१ मत प्राप्त गरे । त्यस्तै कोषाध्यक्ष पदमा भने परमेश्वर साहले १ हजार ४ सय ४३ मत ल्याई निर्वाचित भएका छन् । उनका निकटतम् प्रतिद्वन्दी मनोज कुमार शर्माले ९ सय ४८ मत प्राप्त गरे ।

संघको सम्बद्ध सदस्यमा रेडिमेड संघका अभय मुरारका निर्वाचित भएका छन् । रेडिमेड, सुनचाँदी र पोल्ट्रिफर्म गरी तीन वस्तुगत मतदाता रहेको सो सदस्यका लागि रेडिमेडबाट मुरारका र एकजना सुनचाँदीबाट दुईजना उम्मेदवार थिए । पोल्ट्रिफर्मले रेडिमेडलाई मत दिएपछि मुरारका विजयी भएका हुन् । एसोसिएट सदस्यमा अभिषेक कुमार चौधरीले १ सय २५ मत प्राप्त गरी निर्वाचित भएका छन् । उनका एकमात्र प्रतिद्वन्दी दिपक साहले ६० मत पाए । जनकपुरधाम उद्योग वाणिज्य संघमा जम्मा ४ हजार ७६ मतदाता थिए ।

शनिबार भएको मतदानमा ३ हजार ५ सय ७४ मत खसेको थियो । सदस्यहरुको परिणाम सोमबार बिहानसम्म आउने बताइएको छ । निर्वाचित पदाधिकारीहरुमा अध्यक्षमा भण्डारी(माली), वरिष्ठ उपाध्यक्ष साह(सुडी), उपाध्यक्ष लक्ष्मण साह (तेली), महासचिव फुलदेव पण्डित (कुम्हार), सचिव साह (कलवार) र कोषाध्यक्ष साह (तेली) रहेका छन् । एसोसिएट र वस्तुगत सदस्यमा मारवाडी निर्वाचित भएका छन् ।

अध्यक्ष निर्वाचित भण्डारी नेकपा एमालेका जनकपुरधाम उपमहानगरपालिकाको अध्यक्ष पनि हुन् । उनी बाहेक अन्य पदाधिकारीहरु नेपाली कांग्रेस प्यानलबाट निर्वाचित भएका हुन् ।