२०८१ कार्तिक १७, शनिबार १६:२२
२०औँ ‘द हङकङ सिक्सेस’ क्रिकेट प्रतियोगिताको क्वाटर फाइनलमा नेपाल श्रीलङ्कासँग ४० रनले पराजित भएको छ ।
श्रीलङ्काले दिएको एक सय २४ रनको लक्ष्य पछ्याएको नेपालले पाँच ओभरमा सबै विकेट गुमाएर ८३ रन मात्रै बनाउन सक्यो । त्यस अघि टस हारेर व्याटिङको निम्तो पाएको श्रीलङ्काले निर्धारित ६ ओभरमा दुई विकेट गुमाएर एक सय २३ रन बनाएको थियो ।
यस अघि आजै भएको समूह चरणको अन्तिम खेलमा नेपालले अष्ट्रेलियालाई ११ रनले हराएको थियो । हिजो इङ्गल्याण्डलाई हराएको नेपाल आज अष्ट्रेलियासँगको जीतसँगै समूह विजेता बनेर क्वाटरफाइनलमा प्रवेश गरेको हो ।
नेपालले पहिलो पटक ‘द हङकङ सिक्सेस’ प्रतियोगिता खेलेको हो । प्रतियोगितामा १२ टोली सहभागी छन् । प्रतियोगिताको सेमिफाइनल र फाइनल खेल भोलि हुनेछ ।
