२०८१ कार्तिक १९, सोमबार १४:१२
भारतको उत्तराखण्ड राज्यमा सोमबार बिहान एउटा यात्रुबस दुर्घटना हुँदा कम्तीमा पनि २२ जनाले ज्यान गुमाएका छन् । उत्तराखण्डको अल्मोडास्थित मार्चुलामा यात्रीले भरिएको बस अनियन्त्रित भएर खोँचमा खसेको हो ।
स्थानीयबासीको सहयोगमा अहिले घाइतेहरू र मृतकलाई बाहिर निकालिँदैछ ।अल्मोडा जिल्ला आपदा प्रबन्धन अधिकारी विनीत पालले बीबीसीलाई बताएअनुसार दुर्घटनामा अहिलेसम्म २२ जनाको ज्यान गइसकेको छ ।
बस दुर्घटनामा अन्य १५ जना यात्रु घाइते भएका छन् । घाइतेहरूलाई उपचारका लागि अस्पताल पठाइएको छ । यो बस रामनगर गइरहेको थियो, जो सल्टनजिकै कोपी नामको स्थानबाट खोँचमा खसेको हो ।
अल्मोडाको सल्ट इलाका एसडीएम अधिकारी सञ्जय कुमारले बताएअनुसार दुर्घटनामा ज्यान गुमाएकाहरूको शव अहिले निकालिँदैछ ।
उत्तराखण्डका मुख्यमन्त्री पुष्कर सिंह धामीले अल्मोडामा बस दुर्घटनाबारे सचिव आपदा प्रबन्धन, आयुक्त कुमाऊँ मण्डल र डीएम अल्मोडासँग फोनमा कुरा गरेर जानकारी लिएका छन् । धामीले उद्धार र उपचारलाई तीव्रता दिन निर्देशन दिएका छन् ।
दुर्घटनापछि एसडीआरएफसँगै एनडीआरएफको टोली पनि घटनास्थल पुगेको छ । दुवै टोलीले घटनास्थलमा उद्धार र ज्यान जोगाउने कोसिस थालिसकेको छ।
समाचार एजेन्सी एएनआईका अनुसार मुख्यमन्त्री धामीले पौडी र अल्मोडाका एआरटीओ अधिकारीलाई निलम्बन गर्न निर्देशन दिएका छन् । उनले मृतकका परिवारलाई जनही चार लाख रुपैयाँ र घाइतेलाई उपचारका लागि एक लाख रुपैयाँ दिने घोषणा गरेका छन् ।
