२०८१ कार्तिक २३, शुक्रबार १४:३४
आमजनता पार्टी (आजपा) का अध्यक्ष प्रभु साहले प्रधानमन्त्री केपी शर्मा ओलीको व्यवहार चितवनको ‘ध्रुवे हात्ती’ जस्तो भएको टिप्पणी गरेका छन् ।
उनले व्यवहार ‘ध्रुवे हात्ती’ जस्तो भएको बताउँदै तत्काल सच्याउन सुझाएका छन् । पूर्वमन्त्रीसमेत रहेका साहले प्रधानमन्त्री ओलीको हालत भने ‘भिजेको बिरालो’ जस्तै भएको पनि बताएका छन् ।
सिंहदरबारस्थित संसदीय दलको कार्यालयमा शुक्रबार सञ्चारकर्मीसँगको कुराकानीमा साहले प्रधानमन्त्री ओलीको व्यवहार अराजक भएको बताए । उनले ओलीको पाइला अधिनायकवादतर्फ लम्किएको टिप्पणी गरे ।
जनताले शान्तिपूर्ण आन्दोलन र विरोध प्रदर्शन गर्दा प्रहरी लगाएर दमन गर्ने र युवाहरूले नाम लिएर नाराबाजी गर्दा प्रहरी लगाएर आतंकित बनाउने काम अलोकतान्त्रिक भएको साहले बताए ।
दशरथ रंगशालामा भएको महिला साफ च्याम्पियनको फाइनलमा युवाहरूले ओलीको नाम लिएर नाराबाजी गरेपछि प्रहरीले निगरानी गरेको विषयमा साहले यस्तो टिप्पणी गरेका हुन् ।
सामाजिक सञ्जालमा बोलेको विषयमा जापानमा अध्ययनरत रतन कार्कीलाई इन्टरपोल लगाएर नेपाल ल्याउने तयारी भइरहेको समाचार देख्दा आफूलाई आश्चर्य लागेको साहले बताए । ‘यो सरकार निर्दयी भयो । यस्तो व्यवहारले सरकारको नेतृत्वमा हुनेको ओज बढाउँदैन, बरु सर्वसत्ता लाद्ने नेताको छवि बन्छ’, उनले भने । साहले बचाउ गरेका रतनले प्रधानमन्त्री ओलीलाई दशरथ रंगशालामै मार्न सकिने अराजक टिप्पणी गरेका थिए ।
प्रधानमन्त्री ओलीले आलोचना पचाउन नसकेको साहले बताए । ‘जनताको बहुदलीय जनवादको जगमा उभिनुभएका ओलीले नागरिकस्तरको आलोचना सहन नसक्नु गम्भीर गल्ती हो’, उनले भने, ‘जनता सडकमा शान्तिपूर्ण आन्दोलनमा उत्रिँदा बल प्रयोग गर्नु गलत हो । उहाँको व्यवहार चितवनमा उपद्रो गर्दै हिँड्ने ध्रुवे हात्तीजस्तो भयो, यो सच्याउनुपर्छ । नत्र जनताले ठेगान लगाउनेछन्’, उनले भने ।
