२०८१ कार्तिक २७, मंगलवार ०८:१०
आगामी मंसिर १६ गते हुन लागेको उपनिर्वाचनको क्रममा मधेश प्रदेशको सप्तरीको एउटै पालिकाको दुई वडामा वडाअध्यक्ष पदको निर्वाचन हुने भएको छ ।
उपनिर्वाचनअन्तर्गतको निर्वाचनका विभिन्न प्रक्रियहरु शुरु हुन बाकी छँदै गर्दा स्थानीयतस्तरमा राजनीतिक दलहरुलाई भने निर्वाचन लागिसकेको छ । डाक्नेश्वरी नगरपालिकाको १ र ४ गरी दुई वडामा वडाअध्यक्ष पदका लागि उपनिर्वाचन हुनेछ । निर्वाचन हुन लागेको ती दुबै पदमा यस अघि कांग्रेसका क्रमशः प्रितमलाल चौधरी र हरि प्रसाद राय चुनाव जीतेका थिए । चौधरी र राय दुबैको निधन भएका कारण रित्त हुन गएको पदका लागि उपनिर्वाचन हुन लागेको छ ।
यस अघि दुबै पद कांग्रेस जीतेकाले यसलाई कायम र निरन्तरता दिनु पर्ने कांग्रेसमाथि चर्काे दबाब छ । अहिले ती दुबै स्थान जीतन कांग्रेसलाई दबाब देखिएको कांग्रेसका नेताहरु बताउँछन् । जीतेका सिट बचाईराख्न दिनरात नेता/कार्यकर्ता खटेका छौ, नेपाली कांग्रेस डाक्नेश्वरी नगरपालिका नगर समितिका सभापति नारायण यादवले भने, “पहिल्यै जीतेका ठाउँ भएकाले पनि दुबै ठाँउ पुनःजीतन र निरन्तरता दिन कम्मर कसेर लागेका छौ ।” मंसिर १६ गते हुने उपनिर्वाचनका लागि निर्वाचन कार्यालयले मंसिर २ गते उम्मेदवारको मनोनयन पत्र दर्ताको कार्यतालिका सार्वजनिक गरेकाले दलहरु अहिले उम्मेदवार छान्न र आ–आफ्नो पक्षमा माहौल बनाउन ब्यस्त भएका छन् । यहाँ कांग्रेस जीतलाई निरन्तरता दिने कसरतमा छ भने अन्य दल जसरी पनि आ आफनो पक्षमा जीत निकालेर कांग्रेसको पकड क्षेत्र तोडने प्रयासमा लागेका छन् ।
अहिलेसम्म दुईवटै वडामा नेकपा (माओवादी केन्द्र) र लोकतान्त्रिक समाजवादी पार्टी (लोसपा) नेपालले उम्मेदवारको टुङ्गो लगाएको छ । नेकपा माओवादी केन्द्रले वडा न १ बाट सन्तोष पन्त र वडा नम्बर ४ बाट विन्दा रामलाई उम्मेदवार बनाएको नेकपा (माओवादी केन्द्र)का केन्द्रीय सदस्य अशोक कुमार मण्डल “अमर”ले जानकारी दिए । लोसपा नेपालले वडा नम्बर १ मा राम अधिन सन्त र वडा नम्बर ४ मा अरविन्द कुमार रायलाई उम्मेदवार बनाएको जिल्ला अध्यक्ष सुनिल कुमार झाले जानकारी दिएका छन् ।
कांग्रेसले दुबै वडाको उम्मेदवार मंगलवार एक कार्यक्रम गरी घोषणा गरिने तयारी भएको जिल्ला सभापती रामदेव साहले बताएका छन् । एमालेले वडा नम्बर १ बाट उम्मेदवार छनोट गर्ने प्रक्रिया चलिरहेको तथा वडा न ४ बाट संजय यादवलाई उम्मेदवार बनाउने निर्णय भएको जिल्ला अध्यक्ष ताराकान्त चौधरीले बताए ।
जनमत पार्टीले वडा नम्बर ४ बाट उदयनारायण पण्डितलाई उम्मेदवार बनाउने निर्णय गरेको जिल्ला इन्र्चाज रामगमन साहले बताए । वडा नं १ मा भने उम्मेदवारको टुङ्गो लगाउन बाँकी रहको उनको भनाइ छ । नेकपा एकिकृत समाजवादी, राष्ट्रिय स्वतन्त्र पार्टी (रास्वपा), जनता समाजवादी पार्टी (जसपा) नेपाल, आम जनता पार्टी (आजपा), राष्ट्रिय प्रजातन्त्र पार्टी (रा.प्र.पा.)लगायतलका दलहरुले पनि उम्मेदवारी दिने भन्दै कार्यकर्ताहरुको भावना बुझने र आ आफनो तर्फबाट वडा अध्यक्षका सम्भावित उम्मेदवार हरुको सम्बन्धमा गन्थनमन्थन गर्ने कामलाई तिव्रता प्रदान गरेका छन् ।
उपनिर्वाचन हुने डाक्नेश्वरी नगरपालिकाको वडा नम्बर १ मा २ हजार ६ सय ३५ र वडा नम्बर ४ मा १ हजार २ सय ८१ मतदाता छन् । निर्वाचनका लागी कुल ३ मतदान स्थल र ५ मतदान केन्द्र तोकिएको जिल्ला निर्वाचन अधिकारी रमेश कुमार जोशीले जानकारी दिए । मंसिर १६ गते आइतबार बिहान ७ बजेदेखी अपराह्न ५ बजे सम्म मतदान हुने जिल्ला निर्वाचन कार्यालय सप्तरीले जनाएको छ । यता जिल्ला प्रहरी कार्यालय सप्तरीले पनि उपनिर्वाचन भयरहीत वातावरण तथा शान्तिपूर्ण ढंगले सम्पन्न गर्न आवश्यक सुरक्षा प्रबन्धबारे तयारी गरिरहेको जनाएको छ ।
