२०८१ कार्तिक २७, मंगलवार १४:३६
रास्वपाका सभापति तथा पूर्वगृहमन्त्री रवि लामिछानेलाई रुपन्देहीको भैरहवामा लगिएको छ ।
सहकारी ठगी, संगठित अपराध र सम्पत्ति शुद्धीकरणमा २६ दिनदेखि कास्की प्रहरी हिरासतमा रहेका लामिछानेलाई पोखराबाट विमानमार्फत भैरहवा पुराइएको हो ।
लामिछानेलाई भैरहवा ल्याउने भएपछि बिहानैबाट गौतमबुद्ध अन्तर्राष्ट्रिय विमानस्थल तथा भैरहवा क्षेत्रमा सुरक्षा व्यवस्था कडा बनाइएको थियो ।
भैरहवा विमानस्थलबाट लामिछानेलाई जिल्ला सरकारी वकिलको कार्यालयमा बयानका लागि लगिएको छ ।
रास्वपाका कार्यकर्ता र सुप्रिम सहकारीका बचतकर्ताको प्रदर्शनका कारण उनलाई कडा सुरक्षाबीच सरकारी वकिल पुर्याइएको हो । भैरहवाको बुद्धचोक, लुम्बिनी गेटलगायतको ठाउँमा रविको पक्ष र विपक्षबीचको निरन्तर प्रदर्शनले सम्भावित सुरक्षा जोखिमलाई ध्यान दिँदै स्थानीय प्रशासनले निषेधाज्ञा घोषणाको तयारी गरेको छ ।
जिल्ला सरकारी वकिल कार्यालय भैरहवाका प्रमुख प्रेमराज पौडेलको कार्यकक्षमा उनको बयान जारी छ ।
दिउँसो साढे १२ बजे पोखराबाट भैरहवास्थित गौतमबुद्ध विमानस्थलमा जहाजमार्फत् ल्याइएका लामिछानेलाई त्यहाँबाट केही समय रेष्ट गर्न जिल्ला प्रहरी कार्यालय लैजाने तयारी थियो । तर, उनले आफूले रेष्ट नगर्ने बताएपछि सरकारी वकिल कार्यालय लगेर बयान लिन सुरु गरिएको हो ।
रुपन्देही प्रहरी प्रमुख रञ्जितसिंह राठौरले सकेसम्म आजै बयान सक्ने तयारी भएपनि पोखराबाट आउँदा नै ढिला भएकाले समय अपुग हुन सक्ने बताए । लामिछानेलाई बढीमा ३ दिनमात्र रुपन्देहीमा राख्ने प्रहरीको तयारी छ ।
रविसहित गोर्खा मिडिया नेटवर्कका उपाध्यक्ष एवं पूर्वडीआईजी छविलाल जोशी बञ्जाडे, सुप्रिम बचत तथा ऋण सहकारी संस्थाका पूर्वअध्यक्ष एवं वर्तमान संरक्षक गितेन्द्रबाबु राईसहित झन्डै ४० जनालाई सहकारी ठगी र संगठित अपराधको कसुरमा पक्राउ गरी अनुसन्धान गर्न रुपन्देही जिल्ला अदालतले प्रहरीलाई अनुमति दिएको थियो ।
बुटवलको सुप्रिम बचत तथा ऋण सहकारीको १४ करोड २९ लाख ३६ हजार रूपैयाँ गैरकानुनी रूपमा गोर्खा मिडिया नेटवर्कमा लगेर खर्च गरेको उनीमाथि अभियोग छ ।
