२०८१ मंसिर १३, बिहीबार ०७:२२
विवादित छवि भएका महोत्तरीका प्रमुख जिल्ला अधिकारी (सीडीओ) लालबाबु कवारीको संलग्नतामा घुसखोरी व्याप्त बढेपछि गृहमन्त्री रमेश लेखक स्वयम्ले स्पष्टीकरण सोधेका छन् ।
महोत्तरीको जिल्ला प्रशासन कार्यालयको प्रशासन शाखाका नायब सुब्बा अशोककुमार यादव घुससहित पक्राउ परेका हुन् ।अख्तियार दुरुपयोग अनुसन्धान आयोगको बर्दिबास टोलीले यादवलाई पक्राउ गरेको थियो । त्यसपछि गृहमन्त्री लेखकले कवारीलाई मन्त्रालयमा नै बोलाएर स्पष्टीकरण लिएका छन् ।
गृहमन्त्री लेखकले प्रशासन कार्यालयम नै भइरहेको अनियमितता रोक्न असफल रहेको भन्दै मिलेमतोको विषय समेत उठाएको बताइएको छ । यादवले दिएको वयानमा प्रमुख जिल्ला अधिकारी कवारीले समेत भागबण्डा लिने गरेको बताएको स्रोतले जनाएका छन् । प्रजिअ कवारीको विगतमा पनि अत्यन्त विवादित छ । उनी सिरहामा सीडीओ हुँदा पनि अत्यन्त विवादित बनेका थिए ।
दलालहरु राखेर उनले घुस लिने, जग्गा जमिनको विवाद सुल्झाउने भूमिका गर्दा अत्यधिक रकम लिने गरेको आरोप लागेको थियो । उनले घुस लेनदेनको संवाद गरेको अडियो पनि सार्वजनिक भएको थियो । त्यसमा उनले जग्गाको विवाद मिलाउन लेनदेनको विषयमा गरेको संवाद थियो । अडियो सार्वजनिक भएपछि उनलाई सिरहाबाट मन्त्रालयले तानेको थियो ।
कवारी महोत्तरी जिप्रकामा आउनासाथ घुसखोरी निकै बढेको बताइन्छ । पीडित सर्वसाधारणको दुखेसो जिप्रकामा सुनिदैन । पीडकले घुस दिएर आफ्ना पक्षमा काम गराउने गरेको आरोप लाग्दै आएको छ । सर्वसाधारणले नागरिकता, मुद्दा लगायतमा घुस नदिइ काम नै अगाडि नबढ्ने महोत्तरीका नेताहरुले समेत बताउन थालेका छन् ।
गृहमन्त्रालय स्रोतका अनुसार महोत्तरी जिल्लाको रामगोपालपुर नगरपालिकाको वडा नम्बर २ मा उपचुनाव भइरहेकोले कवारीको सरुवा रोकिएको छ । चुनाव सकिए लगतै उनलाई मन्त्रालयले कारवाही गरिने स्रोतले जनाएको छ । कवारीले जिप्रका महोत्तरीमा सरुवा भएर आएदेखि १० दिन काम गर्न नपाउँदै घुसकै विवादमा तानिएका छन् ।
जिप्रका महोत्तरीमा अख्तियारले रंगेहात कर्मचारी पक्राउ गरेको सम्भवत यो नै पहिलो हो । यस सम्बन्धमा कवारीसित सम्पर्क हुन सकेन । यसैगरि पर्साका प्रमुख जिल्ला अधिकारी (सीडीओ) गणेश अर्याललाई पनि गृहमन्त्रालयमै बोलाएर मन्त्री लेखकले स्पष्टीकरण सोधेका छन् । अर्यालले गत हप्ता अस्पताल तोडफोड सम्बन्धी विषयमा विवादित अभिव्यक्ति दिएको आरोप लागेको हो । उनले दिएको अभिव्यक्ति समाजिक सञ्जालमा सार्वजनिक भएको थियो ।
अर्याल पर्सा आउनु अघि पनि अभिव्यक्तिकै कारण विवादमा परेका थिए । जिल्लाको सीडीओले बोल्ने मर्यादा समेत नबुझेका अर्याललाई गृहमन्त्री लेखकले हप्काएका थिए । जथाभावी बोल्ने, जोसुकैसित सम्पर्क बढाउने, सेवाग्राहीको कामप्रति गम्भीर नहुने आरोप उनीमाथि लाग्दै आएको छ । मधेश प्रदेशमा पर्सा जिल्ला अत्यन्त संवेदनशिल मानिन्छ ।
तस्करीको हब मानिएको पर्सा जिल्लामा अनेक प्रकारको अवैध धन्धा हुने गरेको छ । सीडीओले पर्सालाई सर्वाधिक उर्बर भूमिको रुपमा लिने गरेका छन् । मन्त्रालय स्रोतका अनुसार दुवै जिल्लाका सीडीओहरूलाई आइन्दा प्रश्न उठ्ने किसिमको गतिविधि नगर्न चेतावनी दिएको छ । बुधवार सम्म दुबै सीडीओ कार्यक्षेत्रमा फर्किसकेका छैनन् ।
