२०८१ माघ २२, मंगलवार ०७:३७
मधेश प्रदेशका प्रदेश प्रमुख सुमित्रा सुवेदी भण्डारीले मधेश प्रदेश सभाले प्रदेशको समृद्धि, विकास तथा सामाजिक विकृतिहरूको अन्त्य गर्नेका लागि नेतृत्वदायी भूमिका खेल्नुपर्ने बताएकी छन् ।
मधेश प्रदेश सभाको सातौँ वार्षिकोत्सवको अवसरमा आयोजित विशेष समारोहको उद्घाटन गर्दै उनले मधेश प्रदेश र प्रदेश सरकारमा लाग्ने गरेका विभिन्न आरोप चिर्न प्रदेशमा आर्थिक अनुशासन कायम गर्न जरुरी रहेको बताइन् । प्रदेश प्रमुख भण्डारीले प्रदेशप्रति हुने गरेको नकारात्मक टिप्पणी चिर्दै सङ्घीयता तथा गणतन्त्रको संस्थागत विकास हुने किसिमको गतिविधि गर्न प्रदेश सरकार र प्रदेश सभाका सदस्यहरूसँग आग्रह गरिन् ।
मुख्यमन्त्री सतीशकुमार सिंहले प्रदेशमा सुशासन तथा जनतालाई विकासको अनुभूति गराउनका लागि प्रदेश सरकारले विभिन्न बाधा तथा व्यवधानका बीचमा काम गरिरहेको र यसको परिणाम चाडै देखिने बताए । सभापतिको आसनबाट मधेश प्रदेशका सभामुख रामचन्द्र मण्डलले संघीय शासन प्रणालीमा देश गएपछि मधेशको गाउँ गाउँमा विकासको लहर आएर गाउँहरू अहिले शहरमा परिणत हुन थालेको बताए ।
शिक्षा तथा संस्कृति मन्त्री रानी शर्मा तिवारीले शिक्षामा लगानी नबढाएसम्म प्रदेशको समृद्धि र विकास कठिन हुने भएकाले सबै तहका सरकारलाई शिक्षामा लगानी बढाउन आग्रह गरिन् । मधेश प्रदेशका खेलकुद तथा समाज कल्याणमन्त्री प्रमोद जयसवालले मधेश प्रदेश सभाले प्रदेशमा विकास तथा सुशासन अगाडी बढाउनका लागि नेतृत्व दायी भूमिका खेल्न आवश्यक भएको बताए ।
नेपाली काँग्रेसका नेता रामसरोज यादवले मधेश प्रदेशलाई अगाडी बढाउनका लागि प्रहरी तथा निजामती कर्मचारीको समायोजन शीघ्र रुपमा हुनुपर्ने धारणा राखे । सातौँ वार्षिकोत्सव कार्यक्रममा जनमत पार्टीका संसदीय दलका नेता महेश प्रसाद यादव, नेकपा माओवादी केन्द्रका संसदीय दलका नेता भरतप्रसाद साह, नेकपा एकीकृत समाजवादी पार्टीका रत्नेश्वर लाल गोईत, नागरिक उन्मुक्ति पार्टीका उर्मिला देवी सिंह, जिल्ला समन्वय समिति धनुषाका प्रमुख राजनन्दन मण्डल, बृहत्तर जनकपुर क्षेत्र विकास परिषद्का अध्यक्ष शीतल साहले शुभकामना दिएका थिए ।
यस वर्षको सर्वोत्कृष्ट प्रदेश सभा सदस्यको रुपमा जनता समाजवादी पार्टीका प्रमुख सचेतक रामअशिष यादव र सर्वोत्कृष्ट कर्मचारीको रुपमा रेडियो नेपालबाट प्रदेश सभाको स्थापनादेखि नै खटाइएका प्राविधिक अधिकृत ईन्द्र कुमार बहरखेल घोषणा गरिएको छ । उनीहरूलाई प्रदेश प्रमुख भण्डारीले सम्मानपत्र तथा नगदसहित सम्मान गरिन् ।
