२०८१ माघ २२, मंगलवार ०९:३७
जितको खोजीमा रहेको नेपालले मंगलबार कीर्तिपुरस्थित त्रिवि क्रिकेट मैदानमा थाइल्यान्डसँग प्रतिस्पर्धा गर्दैछ। त्रिदेशीय महिला टी-२ शृङ्खलामा लगातार तीन खेलमा पराजित नेपालले तीन खेलमा अपराजित थाइल्याण्डसँग दिउँसो १२:१५ बजे प्रतिस्पर्धा गर्न लागेको हो।
घरेलु मैदानमा नेपालमाथि जितको दबाब छ भने पाहुना टोली थाइल्याण्ड अपराजित यात्रालाई कायम राख्न उच्च मनोबलका साथ मैदानमा हुनेछ।
पहिलो खेलमा नेदरल्याण्ड्सँग २० रनले पराजित भएको नेपाल दोस्रो खेलमा थाइल्याण्डसँग चार विकेटले चुक्यो। तेस्रो खेलमा आइतबार नेपाल फेरि नेदरल्याण्ड्सँग १५ रनले पराजित भयो।
नेपालले ब्याटिङ, बलिङ र फिल्डिङमा केही महत्त्वपूर्ण अवसर गुमाउँदा जितका लागि संघर्ष गर्नु परेको छ। बलिङ राम्रो हुँदा ब्याटिङमा कमजोर देखिएको नेपालले प्रतियोगिता सुरु हुनुभन्दा अगाडि घरेलु मैदानमा त्रिदेशीय ट्रफी उचाल्ने सपना देखेको थियो। तर, नेपाल अहिले आफ्नै मैदानमा पहिलो जितका लागि संघर्ष गरिरहेको छ।
पहिलो खेलमा नेदरल्याण्ड्सलाई आठ विकेटले हराएको थाइल्यान्डले दोस्रो खेलमा नेपाललाई चार विकेट हराएको थियो। तेस्रो खेलमा नेदरल्याण्ड्सलाई १७ रनले हराएको थाइल्याण्ड्सले तीन खेलबाट ६ अंक बनाएको छ।
तालिकाको दोस्रो स्थानमा रहेको नेदरल्याण्ड्सले चार अंक जोड्दा नेपाल अंकबिहीन तालिकाको पुछारमा छ। आजको खेलमा पराजित भए नेपालको उपाधि यात्रा समाप्त हुनेछ। आजको जितले भने गणितीय सम्भावना कायमै रहनसक्छ।
