२०८१ चैत्र ७, बिहीबार ०७:३८
राजर्षि जनक क्याम्पसको आयोजना र जिल्ला क्रिकेट संघ धनुषाको संयोजनमा जनकपुरधाममा चैत ९ गतेदेखि टि–२० क्रिकेट प्रतियोगिता आयोजना हुन लागेको छ ।
जनकपुर पेस फाउण्डेशनको सहयोगमा आयोजना हुने यस प्रतियोगिताले विद्यार्थीहरूलाई खेलकुदमार्फत शारीरिक र मानसिक विकासको अवसर प्रदान गर्ने उद्देश्य राखिएको आयोजकले पत्रकारसम्मेलनमार्फत जानकारी दिएको छ ।
प्रतियोगिता जनकपुरधामको रामजानकी बहुउद्देश्यीय रङ्गशालामा सञ्चालन हुनेछ । यो १३ गतेसम्म चल्नेछ । कक्षा ११ देखि स्नातकोत्तरसम्मका विद्यार्थीहरूलाई प्रतियोगितामा भाग लिनका लागि खुला अनुमति दिइएको छ । यो प्रतियोगिता युवा पिढीलाई लागु पदार्थको बढ्दो प्रभावबाट बचाउन र स्वस्थ जीवनशैलीको प्रोत्साहन गर्ने उद्देश्यले आयोजना गरिएको हो ।
लीग फरमेटमा हुने यस प्रतियोगितामा जनकपुरधामका प्रमुख कलेजहरू राजर्षि जनक क्याम्पस, गुगल प्रसाद उच्च मावि बसहिया, राराव क्याम्पस, जनकपुर कम्युनिटी कलेज, मिट क्याम्पस र मोनाष्टिक कलेजका विद्यार्थीहरू प्रतिस्पर्धा गर्नेछन् ।
प्रतियोगितामा लगभग ९ लाख रुपैयाँ खर्च हुने अनुमान गरिएको छ । विजयी टिमलाई मेडल, शिल्ड र प्रमाणपत्र प्रदान गरिनेछ । आयोजकले यस प्रतियोगिताले विद्यार्थीहरूलाई खेलकुदमा प्रोत्साहित गर्न र स्वस्थ जीवनशैली अपनाउन महत्त्वपूर्ण भूमिका खेल्ने विश्वास व्यक्त गरेका छन् ।
