२०८१ चैत्र ११, सोमबार ०७:२९
माध्यामिक शिक्षा परीक्षा (एसईई) अन्तर्गत आइतबारको परीक्षामा चिट चोर्न प्रयोग भएका ४ सय ६९ थान मोबाइल बरामद भएको छ ।
जिल्ला प्रहरी कार्यालय रौतहटका प्रवक्ता प्रहरी नायव उपरीक्षक (डीएसपी) दीपक कुमार रायका अनुसार जिल्लाका विभिन्न परीक्षा केन्द्रबाट चेकजाँचका क्रममा मोबाइल बरामद गरिएको छ ।
डीएसपी रायका अनुसार परीक्षार्थीहरूले आफ्नो शरीरमा मोबाइल लुकाई परीक्षा हलमा प्रवेश गराएको अवस्थामा चेकजाँच गर्दा ती मोबाइल बरामद भएका हुन् । परीक्षाको मर्यादा भंग गर्ने प्रयासमा संलग्न भएकाले ती मोबाइल नियन्त्रणमा लिइएको उनले बताए ।
यसै क्रममा परीक्षा निरीक्षकका रूपमा खटिएका २ जना गार्डहरूलाई पनि चिट चोर्न मद्दत गरेको आरोपमा नियन्त्रणमा लिइएको छ । गार्डहरूले परीक्षार्थीहरूलाई मोबाइल पास गराउने, उत्तर बोलेर लेखाउने जस्ता कार्यमा संलग्न रहेको खुलासा भएको छ ।
यसअघि पनि परीक्षाको पहिलो दुई दिनमा मात्रै ७ सय ६४ थान मोबाइल बरामद गरिएको थियो ।
हालसम्म बरामद गरिएका सबै मोबाइल प्रहरीको नियन्त्रणमा रहेको र घटनाबारे थप अनुसन्धान भइरहेको डीएसपी रायले जानकारी दिएका छन् । प्रहरीले परीक्षा सुरक्षामा कडाइ गर्दै चिट चोर्नेजस्ता अनियमितता रोक्न विशेष निगरानी बढाएको छ ।
