२०८२ बैशाख २३, मंगलवार ०७:२२
मधेश प्रदेशले जानकी नवमीको अवसरमा मंगलबार सार्वजनिक बिदा दिएको छ ।
गृह, सञ्चार तथा कानुन मन्त्रालयले जानकी नवमीको अवसरमा प्रदेशभर सार्वजनिक विदा दिएको छ । सीताको जन्म दिनको स्मरणमा आज जनकपुरधाममा धुमधामका साथ जानकी नवमी मनाइँदै छ । वैशाख शुक्लनवमीको दिनलाई जानकी नवमीको रुपमा मनाउने गरिन्छ । सीताको जन्मदिनको अवसरमा जनकपुरधाममा मंगलबार पूजाअर्चना भजनकीर्तन गरिदैँछ ।
विहानैदेखि जानकी मन्दिर, राम मन्दिर र जनक मन्दिरलगायत मन्दिरमा पूजाआजा गर्ने श्रद्धालुहरुको भिड लागेको छ । जानकी नवमीमा सहभागी हुन नेपाल तथा भारतका विभिन्न स्थानबाट श्रद्धालु भक्तजन एवं पर्यटकहरु जनकपुरधाम पुगेका छन् ।
विहान दुधमती नदीमा स्नान, १० बजेदेखि मन्दिरमा बधाइगान, १२ बजे प्राकट्य उत्सव, साँझमा जानकी डोला यात्रा, रातिमा तिल्कोत्सव र पुनः बधाई गानको कार्यक्रम राखिएको जानकी मन्दिरका उत्तराधिकारी महन्त रामरोशन दासले जानकारी दिए ।
