२०८२ श्रावण १३, मंगलवार १३:१४
नेपाल विद्युत् प्राधिकरणको कार्यकारी निर्देशक हितेन्द्रदेव शाक्यले सुख्खा संकटग्रस्त मधेश प्रदेशमा डिप बोरिङ जडान हुने स्थानमा छिटो भन्दा छिटो विधुतको पहुँच पुराउन मातहतका कार्यालयलाई निर्देशन दिनुभएको छ ।
मंगलबार जनकपुरधामस्थित प्रादेशिक वितरण केन्द्रमा मधेश प्रदेशका सवै वितरण प्रमुखसंग छलफल गर्दै कार्यकारी निर्देशक शाक्यले डिप बोरिङ जडान हुने स्थानमा स्थानीय तह र मातहतका निकायहरुसंग समन्वय गर्दै विधुतको तार, पोल, मिटर जडान लगाएतका काम ५ देखि १० दिन भित्र गरिसक्न निर्देशन दिनुभएको हो । सिँचाईका लागि सहज गर्न थ्रीफेज लाइन जडान गर्नुपर्ने भन्दै उहाले प्रक्रियामा बिषयमा नअल्झिकन छिटो सेवा दिन समेत निर्देश गर्नुभयो । शाक्यले प्राधिकरण सेवामूलका साथै व्यवसायीक संस्था भएकाले विधुत बिक्रिबाट संस्था सञ्चालन हुने स्पष्ट पार्नुभयो । प्राधिकरण सरकारको अनुदानबाट नचल्ने भएकाले सेवा सुविधा बढाउनका लागि दवाव दिनु उचित नभएको उहाको भनाइ छ ।
शाक्यले प्राधिकरणको घाटा बढ्दै गए संस्था नोक्सानमा जान धेरै समय नलाग्ने भएकाले यसबारेमा सवैलाई बुझाउन जरुरी रहेको बताउनुभयो । सेवा भनेर निशुल्क विधुत बाड्न नसकिने उहाले स्पष्ट पार्नुभयो । उहाले सिँचाई र खानेपानीका लागि सस्तोमा विधुत उपलव्ध गराउने प्रतिवद्धता जनाउनुभयो ।
