२०८२ भाद्र १७, मंगलवार ०७:२८
पर्साको वीरगञ्जमा हैजा तथा झाडापखाला अझैसम्म पनि नियन्त्रणमा आउन सकेको छैन । वीरगञ्जमा थप २६ जना गम्भीर प्रकारको झाडापखालाका बिरामी भेटिएको छ ।
यससँगै जिल्लामा भेटिने गम्भीर प्रकारका झाडापखालाका कुल संक्रमितको संख्या ८ सय ५८ जना पुगेको छ । स्वास्थ्य कार्यालय पर्साले जनाए अनुसार सोमबारसम्मको विवरण ८ सय ५८ जना मध्ये १७ जना आइसीयू र ३ जना एचडीयूमा रहेका छन् । अहिलेसम्म ७ सय ५१ जना भने अस्पतालबाट डिस्चार्ज भएका छन् भने १ सय ७ जना उपचारत्त छन् ।
गत २८ साउनदेखि फाटफुट रुपमा झाडापखालाका बिरामी देखा परे पनि गत साता देखि प्रकोपको रुप लिएको थियो । परीक्षणका क्रममा उनीहरूमा हैजा भएको पुष्टि भएको थियो । झाडापखलाबाट दुई जनाको मृत्यु भएको भनिए पनि हैजाबाट मृत्यु भएको पुष्टि भएको छैन ।
त्यस्तै आरडिटी र कल्चर दुवै परीक्षणमा हैजा नै पुष्टि हुने बिरामीको संख्या एक सय ७३ पुगेको छ । यसमध्ये हाल ४१ जना अस्पतालमा भर्ना भएर उपचार गरेका छन भने बाँकी एक सय ३२ जना डिस्चार्ज भइसकेको जनाइएको छ । हैजा नियन्त्रणका लागि संघीय, प्रदेश र स्थानीय तहका सरकारहरूले मिलेर काम गरेका छन्।
विश्व स्वास्थ्य संगठनले प्राविधिक तथा औषधि उपचारका लागि सहयोग गर्दै आइरहेको छ । दुई हप्तादेखि वीरगञ्जमा फैलिएको हैजाको स्रोत अझै पत्ता लागेको छैन भने यस्तै खालका लक्षणहरू देखिने हुँदा धेरै मानिस हैजा र झाडापखालाबाट झुक्किने गरेको पाइएको छ । तर हैजाको जीवाणु शरीरमा प्रवेश गरेपछि मानिसहरूलाई निरन्तर दिसा लाग्छ ।
दिसाबाट चामलको चौलानी जस्तो तरल पदार्थ मानिसको शरीरबाट निरन्तर बगिरहन्छ । त्यसो हुँदा बिरामीको शरीरलाई आवश्यक तत्त्व पनि शरीरबाट बाहिरिन्छन् । शरीरलाई आवश्यक पर्ने तत्व न्यून हुँदै जान्छ । पटकपटक वान्ता आउने, पेट वा खुट्टाका मांसपेशी बाउँडिने जस्ता समस्या अधिकांश बिरामीमा देखिने गरिएको छ ।
तरल पदार्थ धेरै खेर जाने भएकाले बिरामीलाई धेरै तिर्खा लाग्ने गरेको बताइन्छ । केही मानिसमा हैजाको लक्षण नदेखिए पनि सङ्क्रमण भएको हुनसक्छ र उनीहरूको दिसामार्फत लगातार केही दिनसम्म हैजाको जीवाणु बाहिर निस्कन्छ । अधिक कमजोरीका कारण केही मानिसहरू बेहोस नै हुनसक्ने चिकित्सकहरूले बताउँछन् ।
