जनकपुर टुडे

२०८२ आश्विन २४, शुक्रबार १९:१३

नेकपा एमालेले वर्तमान सरकारको क्रियाकलापप्रति गम्भीर ध्यानाकर्षण भएको जनाएको छ ।

भक्तपुरको गुण्डुस्थीत अध्यक्ष केपी ओलीको निवासमा शुक्रबार बसेको एमाले सचिवालय बैठकले वर्तमान सरकार निर्वाचन गराउने बाटोमा नभइ मुलुकलाई अनावश्यक तिक्तता, तनाव र मूठभेडतिर लैजान उद्यत भएकाले पार्टीको गम्भीर ध्यानाकर्षण भएको उपमहासचिव प्रदीप ज्ञवालीले बताउनुभयो । प्रहरीमाथि आक्रमण गर्ने र हतियार लुट्नलाई गृहमन्त्रीको दवावमा छाड्ने तर शान्तिपूर्ण प्रदर्शन गर्न खोज्दा दलहरुलाई रोक्ने र नेताहरुलाई स्थानहद तोक्ने सरकारको काम प्रति गम्भीर आपत्ति रहेको उहाले बताउनुभयो । ज्ञवालीले तोकिएको समयमा निष्पक्ष निर्वाचन गराउनका लागि सरकार लाग्न नसकेकाले सरकार राजनीतिक अस्वस्थता बढाउन लागेको होकी आशंका रहेको उल्लेख गर्नुभयो । बैठकमा जेनजी आन्दोलनपछिको अवस्थाका बारेमा सघन रुपमा छलफल भएको भन्दै ज्ञवालीले जेनजी युवाले राखेका आवाज स्वभाविक भएपनि आन्दोलनका नाममा भएको घटनाको गम्भीरताका साथ छानबिन हुनुपर्नेमा एमालेको जोड रहेको बताउनुभयो ।

उहाले जनेजी आन्दोलनलाई आधार बनाएर भाद्र २४ गते भएको घटना लोकतन्त्र, संविधान र इतिहासप्रतिकै ठूलो आक्रमण भएकाले सत्यतथ्य छानविन हुनुपर्ने उल्लेख गर्नुभयो । त्यस्तै उहाले पार्टीको महाधिवेशन छिटै आयोजना गर्नुपर्नेमा नेताहरुको जोड रहेको उल्लेख गदै शनिबार बस्ने पदाधिकारीको बैठकले महाधिवेशनको प्रस्ताव तयार गर्ने जानकारी दिनुभयो ।