२०८२ कार्तिक २२, शनिबार ०८:११
कार्तिक पूर्णिमाको अवसरमा सर्लाही र रौतहटको सीमा भएर बग्ने बागमती नदीमा नुहाउन गएका एक किशोर तीन दिनपछि मृत अवस्थामा फेला परेका छन् ।
सर्लाहीको रामनगर गाउँपालिका–१ स्थित खैर्वाका १४ वर्षीय आशिक यादव कार्तिक १९ गते बागमती नदीमा नुहाउन गएका थिए । खोजतलास गर्दा आशिकको कपडा बागमती नदी किनारमा फेला परेको जानकारी परिवारले सर्लाही प्रहरीलाई दिएका थिए । बर्दिवासस्थित २ नम्बर बाहिनीबाट सशस्त्र प्रहरी नायब निरीक्षक सूर्यबहादुर श्रेष्ठको कमाण्डमा ९ जनाको गोताखोर टोली पनि घटनास्थल पुगेको थियो ।
टोलीले दुई दिनसम्म खोजतलास जारी राखे पनि आशिक फेला परेका थिएनन् । घटनाको तीनदिनपछि शुक्रबार बिहान रौतहट जिल्ला दुर्गा भगवती गाउँपालिका–२ पिपरास्थित बागमती नदीको किनारमा आशिकको शव फेला परेको प्रहरीले जनाएको छ । प्रहरीका अनुसार घटनास्थल खैर्वा बहुअर्वाबाट करिब ७ किलोमिटर पश्चिम–दक्षिणतर्फ पर्छ । शवको मुचुल्का उठाई आवश्यक अनुसन्धान कार्य भइरहेको जिल्ला प्रहरी कार्यालय सर्लाहीले जनाएको छ ।
