२०८२ फाल्गुन ३, आईतवार १६:१७
उज्यालो नेपाल पार्टीले ‘निर्वाचन प्रतिबद्धता–पत्र’ सार्वजनिक गरेको छ।
‘गफ होइन काम, भाषण होइन परिणाम’ भन्ने मुख्य नाराका साथ अध्यक्ष कुलमान घिसिङले घोषणापत्र सार्वजनिक गरे । घोषणापत्रमा सुशासन, आर्थिक समृद्धि र सामाजिक न्यायलाई मुख्य प्राथमिकतामा राखिएको छ।
पार्टीले प्रशासनिक खर्च घटाउन प्रतिनिधिसभा २०१ र प्रदेशसभा सदस्य संख्या ५५० बाट ३३० मा झार्ने बाचा गरेको छ ।
यस्तै, संघीय मन्त्रालय १५ र प्रदेश मन्त्रालय ५ देखि ७ वटामा सीमित गर्ने र राज्यमन्त्री वा सहायकमन्त्री नराख्ने नीति लिइएको छ। ‘प्रत्यक्ष निर्वाचित मुख्यमन्त्री’को अवधारणा अघि सारिएको छ।
सन् २०३५ सम्ममा नेपालको अर्थतन्त्रलाई १११ अर्ब अमेरिकी डलर पुर्याउने र प्रतिव्यक्ति आय करिब ४ हजार डलर पुर्याएर मुलुकलाई मध्यम आय भएको राष्ट्रमा रूपान्तरण गर्ने प्रतिबद्धता गरिएको छ। पार्टीले आगामी ५ वर्षमा ४५ लाख ९वार्षिक ९ लाख० नयाँ रोजगारी सिर्जना गर्ने र युवाहरूका लागि १० लाख रुपैयाँसम्मको विना धितो स्टार्टअप ऋण उपलब्ध गराउने उल्लेख गरेको छ ।
घोषणापत्रमा ऊर्जा क्षेत्रलाई समृद्धिको मुख्य आधार मानिएको छ। सन् २०३० सम्म १२ हजार मेगावाट र २०३५ सम्म २५ हजार मेगावाट विद्युत उत्पादन गरी भारत, बंगलादेश र चीनतर्फ निर्यात गर्ने लक्ष्य राखिएको छ। विद्युत् निर्यातबाट वार्षिक ५ अर्ब डलर राजस्व प्राप्त गर्ने र ‘कार्बन न्युट्रल नेपाल’को अवधारणालाई अघि बढाउने पार्टीको योजना छ।
हरेक नागरिकलाई विश्वविद्यालय तहसम्मको शिक्षा निःशुल्क दिने र ‘कमाउँदै सिक्दै’ कार्यक्रम अन्तर्गत प्लस टुका विद्यार्थीलाई इन्टर्नसिप र मासिक १० हजार भत्ता दिने प्रस्ताव गरिएको छ।
भ्रष्टाचार गर्नेलाई आजीवन सार्वजनिक पदमा प्रतिबन्ध लगाउने र उनीहरूको सम्पत्ति राष्ट्रियकरण गर्ने कठोर नीति पार्टीले लिएको कुलमानले सुनाए । सरकारी कर्मचारी र जनप्रतिनिधिले अनिवार्य रूपमा वार्षिक अनलाइन सम्पत्ति विवरण सार्वजनिक गर्नुपर्ने उल्लेख छ ।
आफ्नो सरकार बनेमा हरेक वर्ष आफ्नो प्रतिबद्धता कार्यान्वयनको प्रगति विवरण ‘रिपोर्ट कार्ड’ मार्फत जनतामाझ सार्वजनिक गर्ने बाचा गरेको छ।
