२०८२ चैत्र ८, आईतवार १८:१५
भारतले आगामी जुनदेखि नेपाली भूमि लिपुलेक भञ्ज्याङ हुँदै चीनसँग सीमा व्यापार थाल्ने तयारी गरेको छ।
फागुन २१ गते चुनाव भएर नेपालको अन्तरिम सरकार बिदा हुनै लागेका बेला दुई ठूला छिमेकीबीच यो प्रक्रिया अघि बढेको हो। नेपालमा नयाँ सरकार आउन अझै एक साता लाग्ने देखिएको छ। बालेन्द्र साह नेतृत्वको सरकारले भारत र चीनको यो कदमबारे के प्रतिक्रिया दिन्छ प्रतिक्षा गर्नुपर्ने भएको ।
सन् २०२० मा कोभिड-१९ महामारीका कारण बन्द भएको यो व्यापारिक मार्ग ६ वर्षपछि खोल्न लागिएको टाइम्स अफ इन्डियाले प्रकाशित गरेको समाचारमा भनिएको छ।
व्यापारिक अवधि जुनदेखि सेप्टेम्बर महिनासम्म (गर्मीको समय) रहने बताइएको छ। त्यसपछिप मौसमको अवस्था हेरेर विस्तार गर्न सकिने भारतीय पक्षको भनाइ छ।
भारतले नेपाली भूमिसमेत हुँदै बनाएको सडकबाट अब व्यापार हुनेछ । उच्च हिमाली क्षेत्र हुँदै फोलिएको सडकबाट चीनको तिब्बत र भारतको उत्तराखण्ड हुँदै व्यापार हुनेछ ।
लिपुलेक नेपाली भूभाग हो । नेपालले यसलाई नक्सामा उल्लेख गरेको छ । तर महाकालीयताको यो भूमि भारतीय नियन्त्रणमा छ । नेपालले पटक पटक विरोध गरे पनि भारत र चीनले त्यस नेपाली भूभागमार्फत् व्यापारिक नाका बनाउन पटक पटक सहमति गरिसकेका छन् ।
अब व्यापारका लागि दुवै देशको प्रक्रियाअनुसार व्यापार अनुमति जारी हुनेछ । यसबाट व्यापारी र उनका सहयोगीलाई दर्ताका लागि पर्याप्त समय दिइने छ ।
नेपालको दार्चुला पारीतर्फ भारतको पिथौरागढका जिल्ला अधिकारी आशिष कुमारले नाका खोल्नुअघि तयारी सुनिश्चित गर्न प्रमुख विभागहरूसँग समन्वय बैठकहरू भइसकेका बताएका छन् ।
भारतीय विदेश मन्त्रालयले पिथौरागढ जिल्लाका अधिकारीहरूलाई यसबारे जानकारी गराएपछि स्थानीय प्रशासनले व्यापारिक सिजनको तयारी थालेको छ। पछिल्लो समय चीन र भारतबीच सम्बन्ध राम्रो हुँदै गएको छ।
