२०८३ बैशाख ११, शुक्रबार १२:२०
सुकुमवासी बस्ती खाली गराउने सरकारको निर्णयको बिरुद्धमा विरोध प्रदर्शन भएको छ ।
एक्कासी आफुहरुलाई हटाउन लागेको भन्दै थापाथलीको बागमती किनार लगाएत अन्य स्थानमा बस्दै आएकाहरुले शुक्रबार सरकार बिरुद्ध प्रदर्शन गरेका हुन् । उनीहरुको प्रदर्शनमा राष्ट्रिय जेनजी नागरिक अभियानले समेत साथ दिदै प्रदर्शन गरिएको थियो । प्रदर्शनमा सहभागीहरुले बिकासका नाममा उठिबास होइन अधिकार चाहिन्छ, गरिबमाथि अन्याय गर्न पाइदैन, पुनर्वास विना हटाउने निर्णय मान्य छैन, वास्तविक सुकुम्वासीको पहिचान गर लगाएतका प्लेकार्ड देखाउदै सरकार विरोधी नारावाजी गरेका थिए । राष्ट्रिय जेनजी नागरिक अभियानका सह–संयोजक अजय सोडारीले सुकुमवासीको हक हित र अधिकारका लागि आफुहरुको पूर्ण समर्थन रहेको बताउनुभयो । उहाले वर्तमान सरकारले डोजर चलाउने भनेर आतंक मच्चाएको धारणा राख्नुभयो । वास्तविक सुकुम्वासीको उचित व्यवस्थापन गरेर मात्रै अन्य कदम चाल्न उहाले आग्रह गर्नुभयो ।
यता शनिबार बिहानबाट सुकुमवासी बस्ती खाली गर्ने जानकारी आएपछि केहिले आफ्नो सामानहरु सार्न सुरु गरेका छन् । भूमिहीन दलित–सुकुमवासी र अव्यवस्थित बसोवासीलाई बस्तीबाट हटाउने सरकारको निर्णयसंगै उनीहरुले सुकुमवासी बस्तीबाट सामान सार्न सुरु गरेका हुन् ।
प्रधानमन्त्री बालेन शाहले वैशाख ९ गते सुरक्षा निकायका प्रमुखहरूलाई बोलाएर सुकुमवासी बस्ती खाली गराउन निर्देशन दिनुभएको थियो । प्रधानमन्त्रीको निर्देशनसंगै शनिबार र आइतबार उपत्यकाभित्र रहेका सुकुमवासी बस्ती डोजर लगाएत हटाउने तयारी भएको छ ।
