२०८३ बैशाख २४, बिहीबार ०७:२२
जनमत पार्टीद्वारा आफ्नै नेतालाई पाखा लगाइ मधेश प्रदेश सरकार ढाल्ने योजनामा बे्रक लागेको छ । मधेश प्रदेश सरकारमा सहभागी जनमत पार्टीले दिएको समर्थन औपचारिक रूपमा फिर्ता लिएको प्रदेश प्रमुखको कार्यालयले जनाएको छ ।
जनमत पार्टीका महासचिवसमेत रहेका प्रदेशसभा सदस्य चन्दन सिंहलाई संसदीय दलको नेतामा चयन गर्दै मधेश प्रदेश सरकारलाई दिएको समर्थन फिर्ता लिएको जनाएको थियो । प्रदेश प्रमुखको कार्यालयले बुधबार एक विज्ञप्ति जारी गर्दै जनमत पार्टीले यही २०८३ वैशाख २२ गतेदेखि लागु हुने गरी सरकारलाई दिएको समर्थन फिर्ता लिएको जनाएको छ ।
जारी गरिएको विज्ञप्तिमा नेपालको संविधानको धारा १६८ को उपधारा -२)बमोजिम गठन भएको मधेस प्रदेश सरकारलाई जनमत पार्टीले दिएको समर्थन फिर्ता लिएको पत्रमा उल्लेख गरिएको छ । सिंहले प्रदेश सरकारबाट दिएको समर्थन फिर्ता लिएको भन्दै वैशाख २२ गते मंगलबार जनमत पार्टी संसदीय दलका नेता समेत रहेका अर्थमन्त्री महेशप्रसाद यादवले समर्थन फिर्ता नलिएको भनी अर्को पत्र बुझाएका थिए । तर जनमत पार्टीले सिंहलाई दलको नयाँ नेता चयन गरिएको भन्ने पत्र पठाएपछि सिंहकै पत्रलाई सदर गरिएको छ ।
जनमतले सरकारलाई दिएको समर्थन फिर्ता लिएसंगै मधेश प्रदेशको राजनीतिक समीकरणमा परिवर्तन हुने संकेत देखिएको छ । तर केन्द्रीय राजनीतिमा भएको उथलपुथलका कारण तत्कालै मधेश प्रदेशमा सरकार परिवर्तन हुने सम्भावना भने न्यून नै छ । कांग्रेसलाई एकल्याएर एमाले, जनता समाजवादी पार्टी (जसपा) नेपाल र जनमत पार्टी मिलेर नयाँ सरकार बनाउने प्रयास थाले पनि अन्तिम समयमा भने सो प्रयास तत्कालका लागि हेर र पर्खको नीतिमा अलमलिएको छ ।
जसपा नेपालले लोसपा नेपालसहितका एकीकृत सांसद जोडेर ठूला दलको हैसियतमा नेतृत्व लिने दाउमा रहे पनि एमालेले पनि आफ् नो दाबीलाई कायमै राखेको थियो । तर कुनै एक दललाई चिढ्याएर प्रदेश सरकार फेरबदल गर्दा जनतामा नकारात्मक सन्देश प्रवाह हुने भन्दै तत्कालका लागि मुख्यमन्त्री कृष्णप्रसाद यादवका प्रदेश सरकार परिवर्तन हुने खतरा टरेको छ । सरकार फेरबदलको खेल शुरु हुनासाथ एमाले, जसपा, जनमतले मुख्यमन्त्री पद पड् काउनका लागिपरेका थिए ।
जसपा नेपाल भित्र लोसपा समूहका जितेन्द्र सोनल र तत्कालीन जसपाका नेता सरोज कुमार यादव मुख्यमन्त्रीका लागि दौडधुपमा लागेका छन् । जनमत पार्टीले आफ्नै पार्टीको सरकारलाई ढाल्ने यो दोस्रो घटना हो । यसअघि जेन– जी आन्दोलनको क्रममा आफ्नै पार्टीका सतीशकुमार सिंह नेतृत्वको सरकार ढालेर कांग्रेसका कृष्ण प्रसाद यादव नेतृत्वमा नयाँ सरकार बनाएको थियो । अब आफू सहभागी सरकारलाई पुनः ढालेर जसपा नेतृत्वको सरकार बनाउने योजना अनुसार अघि बढे पनि असफल भएको छ ।
सत्ता समीकरण फेरबदलमा मधेश प्रदेशका संसदीय राजनीतिक दल लागिपरे पनि अन्तिम समयमा रोकिएको छ । केन्द्रीय राजनीतिकबाट विमुख भइसकेका कांग्रेस, नेकपा र जसपा नेपालका शीर्ष नेताहरुले तत्काल प्रदेश सरकार फेरबदलको खिचातानीमा नलाग्नका लागि निर्देशन दिएका छन् ।
कांग्रेसका सभापति गगन थापा, नेकपाका अध्यक्ष पुष्पकमल दाहाल प्रचण्ड र जसपा नेपालका अध्यक्ष उपेन्द्र यादवले मधेश प्रदेश सरकार फेरबदलमा तत्काल नलाग्न निर्देशन दिएपछि केही समयका लागि सरकार परिवर्तनको राजनीति खेलबाट मुख्यमन्त्री यादवको पद जोगिएको छ । मधेश प्रदेश सरकारबाट जसपा, लोसपा र नेकपा एमालेले प्रदेश सरकारलाई दिएको समर्थन फिर्ता लिने आन्तरिक तयारी गरिसकेका थिए ।
मधेश प्रदेश सभामा १०१ सदस्यमध्ये कांग्रेसका २२, एमालेका २४, नेकपाका १५, जसपा नेपालका २६, जनमतका १२, नागरिक उन्मुक्ति पार्टी, नेपाल संघीय समाजवादी पार्टीका १/१ जना सांसद छन् । लोसपाका अभिराम शर्मा, जसपाका सरोजसिंह कुशवाहा र राप्रपाकी कञ्चन बिच्छा निलम्बित छन् भने जनमतका सतीशकुमार सिंह, नेकपाका भरतप्रसाद साह र रहबर अनसारी प्रतिनिधिसभाको निर्वाचनमा उम्मेदवार हुँदा प्रदेशसभा सदस्यबाट राजीनामा दिएका थिए ।
मधेश प्रदेश सरकारविरुद्ध असन्तुष्टि कायमै रहे पनि केन्द्रीय नेताको हस्तक्षेपका कारण सत्ता समीकरण परिवर्तन टरेको छ । तर जनमत पार्टीभित्रको द्वन्द्व भने उग्र रुपमा अघि बढेको छ । आफ्नै नेतालाई पाखा लगाएर संसदीय दलको नेता फेरबदल र सरकारलाई दिएको समर्थन फिर्ताले मधेश प्रदेशको राजनीतिमा तरंग उत्पन्न गरिए पनि यसको प्रभाव भने नपरेपछि जनमत भित्रकै आन्तरिक किचलो सतहमा देखिएको छ ।
यसले जनमत पार्टी प्रतिको आकर्षण भन्दा पनि स्वार्थसिद्ध राजनीतिमा केन्द्रित हुँदा जनमतका अध्यक्ष सीके राउतमाथि पनि प्रश्न तेर्सिएको उनी निकटकै नेताहरुले बताउन थालेका छन् । जनमतका एक नेताले भने, ‘यहीँ कारणले प्रतिनिधिसभा सदस्यको निर्वाचनमा मधेश प्रदेशसहित देशबाट नै तिरस्कृत हुनु पर्दा पनि कमिसनको चक्करमा पार्टीलाई सिध्याउने खेलमा लाग्नु दुःखद हो ।’
