२०८३ बैशाख २५, शुक्रबार ०९:२०
पश्चिम बंगालका राज्यपाल आरएन रविले त्यहाँको विधानसभा भंग गरेका छन् ।
राज्यपालका तर्फबाट जारी आदेशमा भनिएको छ, ‘भारतीय संविधानको अनुच्छेद १७४ को उपधारा (२)को खण्ड (b) मा प्राप्त अधिकारको सदुपयोग गर्दै म ७ मे २०२६ देखि प्रभावी पश्चिम बंगाल विधानसभा भंग गर्दछु ।’
पश्चिम बंगाल विधानसभाको चुनावी नतिजा आएपछि राज्यमा एक तनाव बढ्दो देखिन्छ । विभानसभा चुनावमा तृणमूल कांग्रेसको हारपछि ममता बनर्जीले मंगलबार मुख्यमन्त्री पदबाट राजीनामा दिन अस्वीकार गरेकी थिइन् ।
पश्चिम बंगालका भाजपा प्रवक्ताले नयाँ सरकार शनिबार शपथ लिने जानकारी दिए । यस्तो अवस्थामा ममताले राजीनामा नदिँदा कैयौं प्रश्नहरु उठेको उनको भनाइ छ ।
पूर्व मुख्य चुनाव आयुक्त एसवाई कुरैशीले दुर्लभ स्थितिमा राज्यपालले मुख्यमन्त्रीको राजीनामा माग्ने अनुमति भएको बताए ।
उनी भन्छन्, ‘यदि राजीनामा आउँदैन भने राज्यपाल संविधानको अनुच्छेद ३५६ को प्रयोग गर्दै राज्यमा संवैधानिक व्यवस्था टुट्न नदिनका लागि राष्ट्रपति शासन लागू गर्नसमेत पाउँछन् ।’
