जनकपुर टुडे

२०८३ जेष्ठ ५, मंगलवार १८:५७

कङ्गोमा कम्तीमा १३१ जनाको ज्यान लिइसकेको इबोला प्रकोप शुरूमा सोचिएको भन्दा छिटो फैलिरहेको हुन सक्ने विश्व स्वास्थ्य सङ्गठन (डब्ल्यूएचओ) का एक प्रतिनिधिले चेतावनी दिएका छन् ।

एजेन्सीले जति धेरै अनुसन्धान गर्छ त्यति नै सङ्क्रमण अन्य क्षेत्रहरूमा फैलिरहेको पत्ता लागेको डब्ल्यूएचओकी डा. एनी एन्सियाले बताउनुभएको बीबीसीले जनाएको छ ।

अधिकारीहरूले आजसम्म कङ्गोमा ५०० भन्दा धेरै शङ्कास्पद सङ्क्रमित रहेको बताएका छन् भने छिमेकी युगान्डामा एक जनाको ज्यान गएको छ । तर लन्डनमा रहेको एमआरसी सेन्टर फर ग्लोबल इन्फेक्सियस डिजिज एनालिसिसको मोडलिङले ‘पर्याप्त’ पत्ता लगाउन नसकिएको र १ हजारभन्दा धेरै सङ्क्रमित भइसकेका कुरालाई अस्वीकार गर्न नसकिने सुझाव दिएको छ ।

अध्ययनका अनुसार अहिलेको प्रकोप ‘अहिले पत्ता लागेको भन्दा ठूलो’ र यसको ‘वास्तविक परिमाण अनिश्चित’ छ । रेडक्रसले यदि सङ्क्रमितहरू चाँडै पहिचान गरिएन भने इबोला भाइरस द्रुत गतिमा फैलिन सक्ने चेतावनी दिएको छ ।

यसैबीच डब्ल्यूएचओले कङ्गोको पूर्वी इटुरी प्रान्तमा इबोला प्रकोप फैलिएपछि त्यसबाट संसारभरि चासो सिर्जना भएको भन्दै ‘विश्व स्वास्थ्य सङ्कट’ घोषणा गरेको छ ।

डब्ल्यूएचओका महानिर्देशक डा. टेड्रोस एड्हानम गेहब्रेयससले ‘सङ्क्रमित व्यक्तिहरूको वास्तविक सङ्ख्या र प्रकोप फैलिएको भूभागबारे व्यापक अनिश्चितता रहेको’ बताउनुभएको छ ।