२०८३ श्रावण ६, बुधबार ०७:१९
मार्बल कम्पनीको नाम र छाप प्रयोग गरी नक्कली पाइप (बोरबेल) बनाउने जानकी प्लाष्टिक उद्योग सञ्चालकको बचाउमा प्रहरी लागेको छ ।
जिल्ला प्रहरी कार्यालय सिरहाले हिरासतमा लिएको जानकी पाइप उद्योगका सञ्चालक नवल मुरारका भन्ने नवकृष्ण मुरारकालाई अस्पतालमा अरामदायी व्यवस्था गरिएको छ । जिल्ला अदालत सिरहाले मुरारकालाई अनुसन्धानको क्रममा सात दिनको म्याद दिएको छ । तर उनलाई प्रहरीले नियन्त्रणमा लिएको भोली पल्ट नै प्रादेशिक अस्पताल सिरहामा विशेष सुविधा उपलब्ध गराएको छ ।
जिल्ला प्रहरी कार्यालयका प्रवक्तासमेत रहेका डीएसपी रमेश बहादुर पालले जनाए अनुसार मुरारका अझै पनि अस्पतालमा नै रहेका छन् । मुरारकालाई अस्पतालमा राख्न आर्थिक चलखेल भएको आरोप लाग्दै आएको छ । अस्पतालका चिकित्सकहरुले उनलाइ भर्ना नै गर्नुपर्ने कुनै कारण नभएको बताएका छन् । तर उनका एकजना आफ्न्त मुरारका थरका चिकित्सकले विशेष सुविधाको व्यवस्था मिलाएको बताइएको छ । ‘ट्रेडमार्क’ चोरी गरी मुरारकाले तीन वर्ष बढी समयदेखि मार्वल कम्पनीको बोरबेल बजारमा बिक्री गर्दै आएका थिए ।
जानकी पाइप उद्योगले कवाडको प्लाष्टिकबाट पाइप बनाउदै आएको छ । तर ख्याती कमाएका कम्पनीहरुको नाम र लोगो प्रयोगगरि महँगो मूल्यमा बिक्रीगदै आएको मुरारकामाथि आरोप छ । जानकी पाइप उद्योगबाट उत्पादन हुने मार्वल कम्पनीको भारी परिमाणमा बोरबेल प्रहरीले बरामद गरेको थियो ।
सिरहा जिल्लाको गोलबजारस्थित नेहाल हार्डवेयरबाट भारी परिमाणमा बोरबेल बरामद भएपछि त्यसका सञ्चाकलाई प्रहरीले नियन्त्रणमा लिएर अनुसन्धान गरेको थियो । त्यसपछि सिरहा प्रहरीले अनुसन्धानकै क्रममा मुरारकालाई नियन्त्रणमा लिएको थियो । मुरारका प्रहरी हिरासतमा रहेको कागजमा देखिएपनि उनी अस्पतालमा उपचारको क्रममा रहेका छन् ।
गोलबजारस्थित नेहाल हार्डवेयरबाट नक्कली मार्वलको बोरबेल बरामद भएपछि प्रहरीले जानकी पाइप उद्योगमा समेत छापा मारेको थियो ।तर वडा प्रहरी कार्यालय मुजेलियाको संरक्षणमा त्यहाँबाट अधिकांश पाइप अन्यत्र लुकाइएको थियो । मार्बल बाहेक अन्य कम्पनीका बोरबेल पाइप पनि जानकी पाइप उद्योगले उत्पादन गरेको खुलेको छ ।
उद्योगका सञ्चालक मुरारकाको स्वामित्वमा रहेको ज्ञानदा स्कुलसँगै रहेको गुड्डु गोयन्काको रियल ईटा उद्योगको परिसरमा लुकाइएको छ । भारी परिमाणमा बोरबेल पाइप लुकाइएको ईटा भट्टा मुजेलिया प्रहरी कार्यालयबाट एक किलोमिटर र लक्ष्मीनिया प्रहरी चौकीबाट बढीमा दुई किलोमिटर दुरीमा रहेको छ ।
प्रहरी अधिकारीलाई नक्कली बोरबेल लुकाइएको सुचना प्राप्त भएको तीन बितिसक्दा पनि प्रहरीले फेला पार्न नसकेको बताइएको छ । प्रहरीले नै नक्कली बोरबेल पाइप उत्पादन गर्ने सञ्चालक र उद्योगलाई संरक्षण गरेको आरोप पीडित कम्पनी मार्वलका अधिकारीहरुले लगाएका छन् । प्रहरीले सूचना प्राप्त गरे पनि नक्कली बोरबेल बरामद नहुनुलाई अधिकारीहरुले उनीहरुको भूमिकाप्रति सवाल उठाएका छन् । उनीहरुका अनुसार पाइप उद्योगबाट नक्कली बोरबेल राती अन्यत्र लुकाइदा मुजेलियाका सइ जानकार रहेका थिए ।
