२०८३ श्रावण ३१, आईतवार १८:०७
भारतीय सेनाध्यक्ष जनरल धिरज सेठ आइतबार अपराह्न काठमाडौं आइपुग्नुभएको छ ।
नेपाली सेनाका प्रधानसेनापति जनरल अशोकराज सिग्देलको निमन्त्रणामा सेनाध्यक्ष जनरल सेठ चारदिने औपचारिक भ्रमणका लागि नेपाल आउनुभएको हो । जनरल सेठले सोमबार राष्ट्रपति रामचन्द्र पौडेलबाट नेपाली सेनाको मानार्थ महारथीको दर्जा ग्रहण गर्ने कार्यक्रम रहेको छ । शीतल निवासमा हुने विशेष समारोहमा राष्ट्रपतिले मानार्थ महारथीको दज्र्यानी चिह्न प्रदान गर्ने कार्यक्रम रहेको छ । भ्रमणका क्रममा सेठले प्रधानमन्त्री तथा रक्षामन्त्री बालेन्द्र शाह, प्रधानसेनापति अशोकराज सिग्देललगायतसँग भेटवार्ता गर्ने कार्यक्रम छ ।
उहाँले टुँडिखेलस्थित सैनिक मञ्चमा श्रद्धाञ्जली अर्पण गर्ने तथा नेपाल–भारतबीचको द्विपक्षीय सैन्य सहयोगका विषयमा छलफल गर्ने बताइएको छ । जनरल सेठले ३० जुन २०२६ मा भारतीय सेनाको प्रधानसेनापतिको जिम्मेवारी सम्हाल्नुभएको थियो । प्रधानसेनापति बनेपछिको सेठको नेपाल भ्रमण पहिलो विदेश भ्रमण हो। नेपाल र भारतका प्रधानसेनापतिलाई एकअर्काको सेनाको मानार्थ महारथीको दर्जा प्रदान गर्ने परम्परा छ ।
