२०८३ भाद्र २२, सोमबार १९:१३
राष्ट्रिय विपद् जोखिम न्यूनीकरण तथा व्यवस्थापन प्राधिकरणले रसुवा बाढीपछि सार्वजनिक भएका गलत भिडियो र भ्रामक सूचनाबारे सचेत रहन आग्रह गरेको छ ।
सोमबार प्राधिकरणले आयोजना गरेको पत्रकार सम्मेलनमा प्राधिकरणका कार्यकारी प्रमुख डा. धर्मराज उप्रेतीले घटनास्थलमै नभएका केही फेक भिडियोहरू सामाजिक सञ्जालमा फैलिएर जनमानसमा नकारात्मक प्रभाव परेको पाइएको बताउनुभयो ।
आधिकारिक व्यक्तिहरुबाट आएका भनिएका भिडियोहरूलाई समेत सामाजिक सञ्जाल हेर्ने टिममार्फत फ्याक्ट चेक गर्दा फेक पाइएकाले त्यस्ता भ्रामक सूचनाबारे सचेत रहन उहाले आग्रह गर्नुभयो । उहाले चीनसँग समन्वय र विज्ञताको आदानप्रदान गरी खोज, उद्धार तथा राहत कार्यमा कुनै कसर बाँकी नराखिएको धारणा राख्नुभयो । बेपत्ता भएकाहरूको नाम आउनेबित्तिकै तीनवटै सुरक्षा निकाय तथा फिल्डमा खटिएका टिमलाई पठाएर खोज तथा उद्धार जारी राखिएको उहाले बताउनुभयो ।
उप्रेतीले खोज तथा उद्धारमा खटिएका हेलिकप्टर खाली भएको समयमा काठमाडौँबाट नभई त्रिशूली वा रसुवाबाटै खाद्य सामग्री, राहत, बिजुली तथा सञ्चारका उपकरणहरू प्रभावित क्षेत्रमा पठाउने प्रयास भइरहेको जानकारी दिनुभयो । राहत नपाएको गुनासो आएका ठाउँमा स्थानीय सरकारसँग निरन्तर समन्वय गरी सम्बोधन गर्ने कार्य भइरहेको उहाको भनाइ छ ।
