२०८३ भाद्र २५, बिहीबार ०९:२६
नेपाल विश्वकर्मा लोहार संघले असोज १ गते मनाइने विश्वकर्मा पूजा पर्वका अवसरमा मधेस प्रदेशभर सार्वजनिक बिदा दिन माग गरेको छ।
संघका अध्यक्ष विवेक शर्माको नेतृत्वमा सचिव रामलाल ठाकुर, सहसचिव रामईश्वर ठाकुर तथा सल्लाहकार नथुनी ठाकुर र रामएकवाल ठाकुरसहितको टोलीले मधेस प्रदेशका मुख्यमन्त्री कृष्णप्रसाद यादवलाई ज्ञापनपत्र बुझाउँदै हरेक वर्ष असोज १ गते प्रदेशस्तरीय सार्वजनिक बिदा घोषणा गर्न माग गरेको हो।
संघले विश्वकर्मा पूजा कुनै एउटा जाति वा समुदायको मात्र पर्व नभएको तर्क गरेको छ। औजार, मेसिन, सवारीसाधन, कलकारखाना तथा निर्माणसँग जोडिएका श्रमिकदेखि प्राविधिक, किसान, चालक, मिस्त्री, उद्योगी तथा व्यवसायीसम्मले विश्वकर्मा पूजा गर्दै आएको संघको भनाइ छ।
ज्ञापनपत्रमा विश्वकर्मा पूजालाई श्रम, सीप, प्रविधि, कला, निर्माण र सिर्जनशीलताको सम्मान गर्ने पर्वका रूपमा व्याख्या गरिएको छ। धार्मिक मान्यतामा भगवान् विश्वकर्मालाई दिव्य शिल्पकारका रूपमा पूजा गरिए पनि पछिल्लो समय यो पर्व विभिन्न पेसा र व्यवसायमा आबद्ध समुदायको साझा सांस्कृतिक उत्सवका रूपमा विस्तार हुँदै गएको संघले जनाएको छ।
बिदाको मागभित्र श्रमको सम्मानको मुद्दा
विश्वकर्मा पूजामा सार्वजनिक बिदाको मागलाई केवल धार्मिक पर्वको बिदासँग जोडेर हेर्नुभन्दा श्रम र सीपसँग सम्बन्धित समुदायको सांस्कृतिक पहिचानलाई राज्यले दिएको मान्यताका रूपमा हेर्नुपर्ने संघको तर्क छ।
मधेसमा ठूलो जनसंख्या श्रम, निर्माण, कृषि, उद्योग तथा प्राविधिक पेसासँग प्रत्यक्ष जोडिएको अवस्थामा विश्वकर्मा पूजालाई प्रदेशको आधिकारिक बिदा सूचीमा समावेश गर्दा सामाजिक समावेशिताको सन्देश जाने संघको बुझाइ छ।
संघले असोज १ गते सामूहिक पूजा–आराधना, सांस्कृतिक कार्यक्रम तथा सामाजिक गतिविधि हुने भएकाले सम्बन्धित समुदायलाई आफ्नो परम्परा सहज रूपमा मनाउने वातावरण बनाउन प्रदेश सरकारले बिदा घोषणा गर्नुपर्ने जनाएको छ।
प्रत्येक वर्ष असोज १ गतेलाई ‘विश्वकर्मा पूजा’का अवसरमा स्थायी प्रदेशस्तरीय सार्वजनिक बिदा घोषणा गरी आधिकारिक बिदा सूचीमा समावेश गर्न संघले मुख्यमन्त्री यादवसमक्ष आग्रह गरेको छ।
संघका अनुसार यस्तो निर्णयले श्रमको सम्मान, सीपको गौरव र सांस्कृतिक विविधताको संरक्षणसँगै मधेस प्रदेशमा सामाजिक एकताको भावना बलियो बनाउन सहयोग पुग्नेछ।
अब संघको मागलाई प्रदेश सरकारले कसरी सम्बोधन गर्छ भन्ने विषय महत्वपूर्ण बनेको छ। धार्मिक तथा सांस्कृतिक पर्वका रूपमा मात्र नभई श्रम र सीपसँग जोडिएको साझा पर्वका रूपमा विश्वकर्मा पूजालाई प्रदेश सरकारले मान्यता दिएमा यसले ‘श्रमको सम्मान’लाई संस्थागत गर्ने नीतिगत सन्देश समेत दिन सक्ने देखिन्छ।
