२०८३ भाद्र ३१, बुधबार ११:०१
बाराको जितपुरसिमरा उपमहानगरपालिका–२३ स्थित सागर आयल पेट्रोल पम्प नजिकै ट्रकले मोटरसाइकललाई ठक्कर दिँदा दुई जनाको मृत्यु भएको छ ।
मंगलबार राति करिब ८ः३० बजे वीरगञ्ज–पथलैया सडकखण्डअन्तर्गत पूर्वतर्फको सर्भिस लेनबाट एक्सप्रेस–वेमा प्रवेश गर्दै गरेको ना।३ ख ५६१० नम्बरको एलपी ग्यास बोकेको ट्रकले जितपुरबाट वीरगञ्जतर्फ जाँदै गरेको ना।४३ प ५१२२ नम्बरको मोटरसाइकललाई ठक्कर दिएको प्रहरीले जनाएको छ ।
ट्रकको ठक्करबाट मोटरसाइकल चालकसहित दुई जना गम्भीर घाइते भएका थिए । उनीहरूलाई तत्काल उपचारका लागि नारायणी अस्पताल वीरगञ्ज लगिएको थियो । उपचारका क्रममा चिकित्सकले दुवैलाई राति ९ः१० बजे मृत घोषणा गरेका हुन् ।
मृत्यु हुनेमा वीरगञ्ज महानगरपालिका–१५ नगवा निवासी करिब ३५ वर्षीय रविन्द्र उपाध्याय र बाराको करैयामाई गाउँपालिका–७ निवासी करिब ३० वर्षीय दिलीप चौधरी रहेका छन् ।
प्रहरीका अनुसार मोटरसाइकल चालक रविन्द्र उपाध्याय नै हुन् वा अर्का व्यक्ति हुन् भन्ने विषयमा थप पुष्टि भइरहेको छ । घटनापछि मोटरसाइकल चालकको पहिचानसम्बन्धी विवरणसमेत यकिन गर्न अनुसन्धान भइरहेको प्रहरीले जनाएको छ ।
घटनास्थलमा इलाका प्रहरी कार्यालय जितपुरबाट वरिष्ठ सई उमेश निरौलाको कमान्डमा ट्राफिक प्रहरीसहित पाँच जनाको टोली तथा इलाका प्रहरी कार्यालय सिमराबाट इन्स्पेक्टर विनोद राज खत्रीको कमान्डमा सोकोसहित सात जनाको टोली खटिएको थियो ।
प्रहरीले दुर्घटनामा संलग्न ना।३ ख ५६१० नम्बरको ट्रक र त्यसका चालक चितवनको भरतपुर महानगरपालिका–७ निवासी करिब ५८ वर्षीय सुनिल राज पाठकलाई नियन्त्रणमा लिएको छ । ट्रक चालकलाई प्रहरी चौकी परवानीपुरमा राखिएकोमा थप अनुसन्धानका लागि इलाका प्रहरी कार्यालय सिमरा ल्याउने प्रक्रिया भइरहेको प्रहरीले जनाएको छ ।
मोटरसाइकल भने इलाका प्रहरी कार्यालय जितपुरको नियन्त्रणमा रहेको छ । मृतक दुवैको शव नारायणी अस्पताल वीरगञ्जमै राखिएको प्रहरीले जनाएको छ ।
