२०८३ आश्विन ३, शनिबार ०७:३९
आफ्नो पुरानो प्रेम प्रसँगले यस्ता क्रुर मृत्यु दिन्छ भन्ने महोत्तरीको भंगहा नगरपालिका–६ का २४ वर्षीय विवेक सरदारले कहिले पनि सोचेका थिएन, कसैले यस्तो कल्पना पनि गर्दैनन् । तर गत २६ भदौमा महोत्तरी बलवा नगरपालिका–७ बनौटामा विवेकको हत्या मात्र होइन हो, शरीरको ९/९ टुक्रा पारी शौचालयको सेफ्टी ट्याँकमा फकियाएको थियो ।
गत भदौ १६ गतेदेखि बेपता रहेका विवेकको शव विभत्स अवस्थामा बनौटाको अशोक ठाकुरको शौचालयको सेफ्टी ट् यांकीमा फेला प¥यो । प्रहरीको प्रारम्भिक अनुसन्धानबाट अशोकको परिवारले नै विवेकको हत्या गरी शव सेफ्टीट्यांकीमा लुकाएको खुलेको छ । विवेक र आफ्नी बुहारी सोनु ठाकुरबीच प्रेम सम्बन्ध रहेको थाहा पाएपछि अशोकको परिवारले घरमै बोलाएर विवेकको हत्या गरेको प्रहरीको प्रारम्भिक अनुसन्धानबाट पत्ता लागेको हो । विवेक र सोनु ठाकुरबीच पहिलेदेखि नै प्रेम सम्बन्ध थियो । यो कुरा थाहा पाएपछि वैदेशिक रोजगारीमा रहेका सोनुका श्रीमान् जितेन्द्र ठाकुरलाई उनको परिवारले नेपाल झिकायो ।
जितेन्द्र गुपचुप रूपमा वैदेशिक रोजागरीबाट फर्केर योजनाबद्ध रूपमा फोन गरी घरमै बोलाएर विवेकको हत्या गरिएको अनुसन्धानमा पाइएको जिल्ला प्रहरी कार्यालयका सूचना अधिकारी इन्स्पेक्टर विश्वम्भरनाथ साहले बताए । उनका अनुसार विवेकको शवलाई ९ टुक्रा पारी सेफ्टी ट् यांकीभित्र हालेर प्लास्टर गरिएको थियो । घटनामा संलग्न रहेको आरोपमा बलवा नगरपालिका–७ का अशोककुमार ठाकुर, उनकी श्रीमती ५० वर्षीया रामकलीदेवी ठाकुर, बुहारी जितेन्द्रकी श्रीमती २२ वर्षीया सोनुकुमारी ठाकुर र ज्वाइँ महोत्तरी गाउँपालिका–५ का २८ वर्षीय सियाराम शर्मालाई प्रहरीले पक्राउ गरेको छ ।
यसरी भयो हत्या ?
रक्षाबन्धनमा आएकी आफ्नी दिदीलाई भदौ १३ गते जलेश्वर नगरपालिका–११ पिगौस्थित घर पु¥याउन विवेक १४ गते साँझ मोटरसाइकलमा गएका थिए । राति त्यहीँ बसेका उनी दिदीको घरबाट बिहान साढे ११ बजेतिर आफ्नो घरतर्फ हिँडेका थिए । तर, घर नपुगेपछि विवेकका परिवारले भदौ १६ गते जिल्ला प्रहरी कार्यालयमा हुलियासहित निवेदन दिए । त्यसपछि विवेकको खोजबिन सुरु भयो । वडा कार्यालयको सीसीटीभी फुटेज, मोबाइल लोकेसन विश्लेषण, प्राविधिक अनुसन्धान लगायतका माध्यमबाट प्रहरीले निरन्तर खोजी ग¥यो ।
अनुसन्धानमा संलग्न अधिकृत साहका अनुसार अन्ततः यहींबाट हराएको र यतै कतै हुनसक्ने निष्कर्ष निकालियो । अशोक ठाकुरलाई शंकाको आधारमा प्रहरीले सुधपुछ र केरकार गर्न थाल्यो । तर उनले आफूलाई कुनै जानकारी नभएको दाबी गरे । अशोकले आफ्नो छोरा जितेन्द्र विदेशबाट आएको कुरा लुकाइरहेका थिए । तर भदौ २६ गते इन्स्पेक्टर साह विवेकको हत्या गरी घरमै लुकाएको हुनसक्ने आशंकामा घरमा पुगेर खोजी गर्न थाले । त्यस क्रममा छोरा जितेन्द्र विदेशबाट आएको केही प्रमाण फेला परे । ‘सोनुका श्रीमान् विदेशबाट आएको कुरा नै लुकाइएको थियो । तर घर खानतलासी गर्दा नयाँ समान देखियो । त्यसपछि उनी घर आएको र केही घटना गरेको निष्कर्षमा हामी पुग्यौं,’ सूचना अधिकारी इन्स्पेक्टर साहले भने । त्यसपछि प्रहरी विवेकको हत्या भइसकेको निष्कर्षमा पुग्यो । घरमा खोजतलासको क्रममा शौचालयको सेफ्टी ट्यांकीको एक छेउमा नयाँ प्लास्टर गरेको देखियो ।
यता लाश लुकाएको हुनसक्ने आशंकामा प्रहरीले प्लास्टर फोड्न सुरु गरेपछि अशोकले हत्या गरेको स्वीकार गरेको प्रहरीको भनाइ छ । अनुसन्धानमा संलग्न अधिकारीका अनुसार शवलाई ९ टुक्रा पारिएको थियो । घाँटी, दुवै हात, दुवै खुट्टा काटिएको थियो । तिघ्रादेखि खुट्टासम्मको भागलाई दुई–दुई टुक्रा पारिएको थियो । त्यसबेलै प्रहरीले अशोकसहित परिवारका तीन जनालाई पक्राउ ग¥यो । छोरा जितेन्द्र फरार नै छन् । ‘हत्यापछि शवलाई टुक्राटुक्रा पारी सेफ्टी ट्यांकीमा राखिएको थियो । जितेन्द्र फरार छन् । खोजी गर्दै छौं,’ इन्स्पेक्टर साहले भने । विवेक र सोनु ठाकुरबीच बिहे अघिदेखि नै प्रेम सम्बन्ध थियो । विवेक र सोनुको माइती एउटै वडा भंगहा नगरपालिका–६ हो । विवेकको घर बिर्जौना टोल र सोनुको माइती संग्रामपुर हो । फरक टोलका दुवै जनाबीच प्रेम सम्बन्ध थियो । सोनुको बिहे ८ वर्षअघि नै भए पनि विवेकसँग हिमचिम भइरहयो ।
१५ गते बुहारी सोनुलाई विवेकलाई फोन गरी बोलाउन लगाइएको, मध्याह्न १२ बजेतिर आएका विवेकलाई बुबाछोरा मिलेर घाँटी थिचेर हत्या गरेको र त्यसपछि फुर्सा -दाउ) ले शवलाई ९ टुक्रा गरी सेफ्टी ट्यांकीमा लुकाइएको उनीहरूले बयान दिएका छन् । प्रहरीले दाउ पनि बरामद गरेको छ । विवेकको मोटरसाइकल अझैसम्म फेला परेको छैन । जितेन्द्रले श्रीमतीसँग परपुरुषको सम्बन्ध रहेको थाहा पाइसकेपछि उतैबाट योजना बनाएर विवेकको हत्या गर्न गोप्य रूपमा विदेशबाट आएको प्रहरीको प्रारम्भिक अनुसन्धानमा देखिएको छ । विवेकको गत फागुनमा बिहे भएको थियो । उता सोनु कुमारीका दुई सन्तान छन् ।
