जनकपुर टुडे

२०८३ आश्विन २३, शुक्रबार ०९:२०

नेपाली कांग्रेसका नेता विमलेन्द्र निधिले पार्टी वैचारिक तथा सांगठनिक रूपमा विभाजित भइसकेको दाबी गरेका छन् । उनले पार्टी विभाजित भइसकेकाले अब नयाँ ढंगबाट संगठन निर्माण गर्नुपर्ने बताएका छन् ।

जनकपुरधाममा नेपाली कांग्रेस धनुषाको १५ औँ जिल्ला अधिवेशनमा प्रमुख अतिथिको आसनबाट बोल्दै नेता निधिले विशेष महाधिवेशनपछि कांग्रेस दुई धारमा विभाजित भएको दाबी गरेका हुन् । कांग्रेस विभाजनको मुख्य जिम्मेवार विशेष महाधिवेशन आह्वान गर्ने पक्ष नै रहेको उनको आरोप थियो । लोकतन्त्र बहुमतको अंकमा मात्र सीमित नहुने भन्दै निधिले पार्टी सञ्चालनमा प्रक्रिया र पद्धतिको पनि उत्तिकै महत्व हुने बताए ।

निर्वाचन आयोगमा पेस गरिएको विवरणअनुसार आफूहरूको पक्षमा ४६ प्रतिशत आधार रहेको दाबी गर्दै उनले त्यसलाई बेवास्ता गरेर गरिएका निर्णय स्वीकार्य नहुने जिकिर गरे । विशेष महाधिवेशनपछि विकसित घटनाक्रमले तत्काल पार्टी एकता सम्भव नदेखिएको भन्दै निधिले अब संगठनलाई नयाँ ढंगले अघि बढाउनुपर्ने बताए । ् उनले विगतमा पनि कांग्रेसभित्र देखिएका विभाजन र मतभेद समयक्रममा समाधान भएको स्मरण गर्दै भविष्यमा परि स्थिति परिवर्तन हुनसक्ने धारणा राखे ।

निधिले आगामी स्थानीय तहको निर्वाचनलाई लक्षित गर्दै कार्यकर्तालाई वडा तहदेखि नै संगठन विस्तारमा सक्रिय हुन आग्रह गरे । युवा पुस्तालाई नेतृत्वमा ल्याउनुपर्नेमा जोड दिँदै उनले आफू वैचारिक रूपमा सक्रिय रहेको र पार्टी पुनर्निर्माणमा निरन्तर लागिरहने बताए । पञ्चायतकालको उदाहरण दिँदै उनले संगठन बलियो भए कठिन परिस्थितिसमेत पार गर्न सकिने भएकाले कार्यकर्तालाई निराश नहुन आग्रह गरे ।