जनकपुर टुडे

२०८३ आश्विन २६, सोमबार ०७:४०

बडा दशैँको दोस्रो दिन सोमबार आश्विन शुक्ल द्वितीयाका अवसरमा घरघरमा देवी दुर्गाको पूजा–आराधना गरिँदैछ ।

घटस्थापनाबाट शुरु भएको नवरात्रिको धार्मिक अनुष्ठानलाई निरन्तरता दिँदै भक्तजनले देवीको स्मरण, पूजापाठ र आराधना गर्ने परम्परा छ । आश्विन शुक्ल प्रतिपदाका दिन घटस्थापना गरी जमरा राखेसँगै सुरु हुने नवरात्रिका नौ दिन देवी दुर्गाका विभिन्न स्वरूपको पूजा गर्ने धार्मिक मान्यता छ । दोस्रो दिन पनि घटस्थापनाका दिन स्थापना गरिएको कलश र जमराको पूजा गरी देवीप्रति श्रद्धा व्यक्त गरिन्छ ।

नवरात्रिका प्रारम्भिक दिनहरूमा घरघरमा पूजापाठ गर्ने, दुर्गा सप्तशती पाठ गर्ने तथा मन्दिरमा दर्शन गर्न जाने चलन छ । दशैँको पहिलो दिन घटस्थापनामा विधिपूर्वक कलश स्थापना गरी जौ, मकै, गहुँलगायतका अन्न छरेर जमरा राखिन्छ । घरको पूजाकोठा वा पवित्र स्थानमा स्थापना गरिएको कलशलाई देवी दुर्गाको प्रतीकका रूपमा पूजा गर्ने परम्परा छ ।

दोस्रो दिन उक्त पूजालाई निरन्तरता दिँदै कलशको पूजा, दीप प्रज्वलन, धूप, फूल तथा नैवेद्य अर्पण गरिन्छ । परिवारका सदस्यहरू भेला भएर देवीको आराधना गर्ने र घरपरिवारमा सुख, शान्ति, समृद्धि तथा आरोग्यको कामना गर्ने चलन छ ।